दै चालु वार्ता 
दैनिक चालु वार्ता प्रतिनिधी गंगाखेड/प्रेम सावंत
गंगाखेड: आगाराची एसटी बस मसला गावाजवळ गुरुवार १२ फेब्रुवारी २०२६ रोजी अपघातग्रस्त झाल्याची घटना घडली असून सुदैवाने या अपघातात कोणतीही जीवितहानी झाली नाही. बसचे पुढील काच फुटून तसेच समोरील भागाचे नुकसान झाले असले तरी प्रवासी सुखरूप बचावले आहेत. ग्रामस्थांच्या तत्परतेमुळे मोठा अनर्थ टळल्याची भावना व्यक्त केली जात आहे.
मिळालेल्या माहितीनुसार, संबंधित एसटी बस गंगाखेडहून मसला येथे प्रवासी सोडण्यासाठी गेली होती. प्रवासी उतरवल्यानंतर बस गंगाखेडकडे काही प्रवासी घेऊन परत येत असताना मसला गावापासून काही अंतरावर चालकाचा वाहनावरील ताबा सुटला. अचानक बस रस्त्याच्या कडेला जाऊन खाली उतरली. या घटनेमुळे काही काळ परिसरात घबराट पसरली.
अपघातानंतर बसच्या समोरील काचा फुटल्या असून बसच्या पुढील भागाचे मोठ्या प्रमाणात नुकसान झाले आहे. मात्र, बस उलटली नाही किंवा गंभीर धडक बसली नाही, त्यामुळे प्रवाशांचे प्राण वाचले. बसमध्ये असलेल्या प्रवाशांना किरकोळ धक्के बसल्याची माहिती मिळाली आहे; मात्र कोणालाही गंभीर दुखापत झालेली नाही.
घटनेची माहिती मिळताच मसला परिसरातील ग्रामस्थांनी तात्काळ घटनास्थळी धाव घेतली. काही ग्रामस्थांनी स्वतः पुढाकार घेऊन बसमधील प्रवाशांना सुरक्षित बाहेर काढले.
दरम्यान, अपघाताचे नेमके कारण अद्याप अधिकृतरीत्या स्पष्ट झालेले नाही. स्थानिक ग्रामस्थांच्या मते, चालकाचा बसवरील ताबा सुटल्याने हा अपघात घडला असावा. संबंधित अधिकाऱ्यांकडून घटनेचा तपास केला जात असून अहवालानंतरच अपघाताचे अचूक कारण स्पष्ट होणार आहे.
या घटनेमुळे प्रवाशांमध्ये काही काळ भीतीचे वातावरण निर्माण झाले होते. ग्रामीण भागात एसटी हीच प्रमुख वाहतूक व्यवस्था असल्याने अशा घटना घडल्यास नागरिकांमध्ये चिंता वाढते. त्यामुळे एसटी प्रशासनाने वाहनांची नियमित तपासणी व चालकांना आवश्यक सूचना देण्याची मागणी प्रवासी व स्थानिकांकडून करण्यात येत आहे.
सुदैवाने या अपघातात जीवितहानी झाली नसली तरी भविष्यात अशा घटना टाळण्यासाठी योग्य ती खबरदारी घेणे आवश्यक असल्याची भावना नागरिकांकडून व्यक्त केली जात आहे.
