दै चालु वार्ता 
दहाव्या दिवशीच खासदार भाजपमध्ये; राजकीय युटर्नमागे तपास यंत्रणांचा ससेमिरा?
खासदार राघव चड्ढा यांच्या नेतृत्वात आम आदमी पक्षाच्या 7 खासदारांनी नुकताच भाजपमध्ये प्रवेश केला. स्वतः चड्ढा यांनी पत्रकार परिषदेत याबाबतची माहिती देत देशाच्या राजकारणात खळबळ उडवून दिली.
या 7 खासदारांमध्ये अशोक मित्तल यांचेही नाव आहे. आम आदमी पक्षाचे उपनेते असलेल्या मित्तल यांचा भाजप प्रवेश सध्या चांगलाच चर्चेचा विषय बनला आहे.
२ एप्रिल रोजी आम आदमी पक्षाचे प्रमुख अरविंद केजरीवाल यांनी राघव चड्ढा यांना राज्यसभेतील ‘उपनेते’ पदावरून हटवून अशोक मित्तल यांची नियुक्ती केली होती. मात्र, आज राघव चढ्ढा आणि अशोक मित्तल या दोघांनीही एकाच वेळी आम आदमी पक्षाला धक्का दिला.
अशोक कुमार मित्तल उत्तर भारतातील बडे उद्योजक असून, शिक्षण क्षेत्रातील प्रतिष्ठित व्यक्तिमत्व म्हणून त्यांची ओळख आहे. पंजाबमधील नामांकित खाजगी विद्यापीठ ‘लव्हली प्रोफेशनल युनिव्हर्सिटी’चे (LPU) संस्थापक आहेत. त्यांनी २०२२ मध्ये राजकारणात प्रवेश केला आणि त्याच वर्षी आम आदमी पक्षाच्या तिकिटावर ते राज्यसभा खासदार बनले.
संसदेमध्ये, अशोक मित्तल यांनी संरक्षण आणि वित्त यांसारख्या महत्त्वाच्या समित्यांवर काम केले आहे; तसेच ते ‘भारत-अमेरिका संसदीय मैत्री गटा’चेही सदस्य राहिले आहेत. अलीकडेच, पहलगाममध्ये झालेल्या दहशतवादी हल्ल्यानंतर, कनिमोझी करुणानिधी यांच्या नेतृत्वाखाली परदेश दौऱ्यावर गेलेल्या सर्वपक्षीय शिष्टमंडळात त्यांचाही समावेश होता.
उपनेतेपदी नियुक्तीनंतर ‘ईडी’चे छापे
१५ एप्रिल रोजी, ईडीने अशोक मित्तल यांच्याशी संबंधित अनेक ठिकाणांवर छापे टाकले होती. जवळपास 850 कोटी रुपयांचे साम्राज्य असलेल्या मित्तल यांच्या गुरुग्रामसह, जालंधर आणि फगवाडा येथील ‘लव्हली ग्रुप’शी संबंधित संस्था, मित्तल आणि त्यांच्या कुटुंबाशी संबंधित निवासस्थाने व इतर व्यावसायिक कार्यालयांवर छापे टाकले होते.
Raghav’परकीय चलन व्यवस्थापन कायद्या’अंतर्गत (FEMA) ही कारवाई केल्याचे ईडीने स्पष्ट केले होते. आता याच मित्तल यांनी अवघ्या 10 दिवसांत भाजपमध्ये प्रवेश केल्याने दबक्या आवाजात या कारवाईमुळेच त्यांनी राजकीय भूमिका बदलल्याची चर्चा आहे.
