काल रात्रीपासून पाकिस्तानमध्ये ‘स्मार्ट लॉकडाउन’ होणार लागू ; शाहबाज शरीफ यांची मोठी घोषणा…

इराणने होर्मुझच्या सामुद्रधुनीतून जहाजांच्या वाहतुकीवर बंदी घातल्यापासून, दक्षिण आशियाई आणि युरोपीय देशांना पेट्रोल, डिझेल आणि एलपीजीच्या तुटवड्याचा सामना करावा लागत आहे.

भारत, नेपाळ आणि बांगलादेशसारख्या देशांनी हे संकट कमी करण्यासाठी महत्त्वपूर्ण पावले उचलली आहेत, परंतु पाकिस्तान मात्र अलिप्त राहिला असून त्याने ‘स्मार्ट लॉकडाउन’ लागू केला आहे. पंतप्रधान शाहबाज शरीफ यांनी मुख्यमंत्र्यांसोबतच्या बैठकीत ही घोषणा केली.

पाकिस्तान रेडिओनुसार, शाहबाज सरकारने पंजाब, खैबर पख्तुनख्वा, बलुचिस्तान, इस्लामाबाद राजधानी क्षेत्र, गिलगिट-बाल्टिस्तान आणि पाकिस्तानव्याप्त काश्मीरमधील बाजारपेठा, शॉपिंग मॉल्स आणि व्यावसायिक क्षेत्रे रात्री ८ वाजता बंद करण्याचा निर्णय घेतला आहे.

इस्लामाबादमध्ये शाहबाज शरीफ यांच्या अध्यक्षतेखाली झालेल्या आढावा बैठकीत हा निर्णय घेण्यात आला. या बैठकीत ऊर्जा संवर्धन आणि पेट्रोलियम उत्पादनांचा वापर कमी करण्यावर लक्ष केंद्रित करण्यात आले.

शाहबाज सरकारने प्रांतीय सरकारशी सल्लामसलत करून, खैबर पख्तुनख्वाच्या विभागीय मुख्यालयांमधील बाजारपेठा आणि शॉपिंग मॉल्स रात्री ९ वाजेपर्यंत सुरू ठेवण्याचाही निर्णय घेतला आहे. त्याचप्रमाणे, सर्व जनरल स्टोअर्स, डिपार्टमेंट स्टोअर्स आणि सर्व प्रकारचे मॉल्स रात्री ८ वाजता बंद होतील.

निर्बंधांमधून मेडिकल आणि फार्मसी वगळल्या

याव्यतिरिक्त, बेकरी, रेस्टॉरंट्स आणि इतर खाद्य व पेय दुकाने, विवाह सभागृह, तंबू आणि इतर व्यावसायिक आस्थापने जिथे लग्न आणि इतर समारंभ आयोजित केले जातात, ती रात्री १० वाजल्यानंतर बंद राहतील. रात्री १० वाजल्यानंतर खाजगी मालमत्ता आणि घरांमध्ये होणाऱ्या विवाह समारंभांवर बंदी घालण्याचा निर्णयही बैठकीत घेण्यात आला.

परंतु, मेडिकल स्टोअर्स आणि फार्मसी या निर्बंधांमधून वगळण्यात आल्या आहेत. हे निर्बंध मंगळवारपासून लागू केले जातील, म्हणजेच पाकिस्तानमध्ये रात्री ८ वाजल्यापासून स्मार्ट लॉकडाउन लागू होईल, असेही स्पष्ट करण्यात आले आहे.

शहबाज सरकारकडून सार्वजनिक वाहतूकही मोफत

याव्यतिरिक्त, शहबाज शरीफ यांनी घोषणा केली की गिलगिट आणि मुझफ्फराबादमधील सार्वजनिक वाहतूक एका महिन्यासाठी मोफत असेल आणि त्याचा संपूर्ण खर्च शहबाज सरकार उचलेल. या बैठकीला उपपंतप्रधान इशाक दार, नियोजन आणि विकास मंत्री एहसान इक्बाल आणि वरिष्ठ अधिकारी उपस्थित होते.