शिवजयंतीनिमित्त ऐतिहासिक विहिरीची स्वच्छता व वृक्षसंवर्धन उपक्रम

इगतपुरी प्रतिनिधी :- विकास पुणेकर

इगतपुरी :- खालची पेठ, इगतपुरी येथील प्राचीन महादेव मंदिर परिसरात श्री साई सहाय्य समिती, इगतपुरी व प्रभनयन फाउंडेशन, अंधेरी यांच्या संयुक्त विद्यमाने छत्रपती शिवाजी महाराज जयंती उत्सव २०२६ निमित्त भव्य सामाजिक व पर्यावरणपूरक उपक्रम राबविण्यात आला.

या उपक्रमांतर्गत शिवकालीन ऐतिहासिक विहिरीची सखोल साफसफाई व गाळ काढण्याचे काम करण्यात आले. अनेक वर्षांपासून दुर्लक्षित असलेल्या या विहिरीचे पुनरुज्जीवन करून ती स्वच्छ व वापरण्यायोग्य करण्याचा प्रयत्न करण्यात आला. यासोबतच मंदिर परिसर व आजूबाजूच्या भागातील कचरा गोळा करून स्वच्छता अभियान राबविण्यात आले.

तसेच परिसरातील वृक्षांना पाणी देऊन आणि त्यांची निगा राखून “पर्यावरण संवर्धन” व “झाडे लावा, झाडे जगवा” या संदेशाचा प्रभावी प्रचार करण्यात आला. या उपक्रमामुळे नागरिकांमध्ये स्वच्छता, पाणी संवर्धन व पर्यावरण संरक्षणाबाबत सकारात्मक जागृती निर्माण झाली आहे.

या सामाजिक मोहिमेत श्री साई सहाय्य समितीचे अध्यक्ष व वरिष्ठ पत्रकार राजु देवळेकर, पत्रकार विकास पुणेकर, तसेच राहुल शेटे, रितिक शेटे, राहुल साळूंखे, अथर्व मुर्तडक, उदय उघडे, दीप शिंदे, सुगत लभाने आदी सदस्यांनी मोठ्या उत्साहाने सहभाग नोंदवला. सर्व कार्यकर्त्यांनी श्रमदान करून हा उपक्रम यशस्वी केला.

यावेळी बोलताना मान्यवरांनी सांगितले की, शिवजयंती उत्सव केवळ उत्सवापुरता मर्यादित न ठेवता समाजोपयोगी उपक्रमांच्या माध्यमातून साजरा करणे ही काळाची गरज आहे. स्वच्छता, पाणी संवर्धन व पर्यावरण संरक्षण या माध्यमातून समाजाला सकारात्मक दिशा देण्याचा आमचा प्रयत्न आहे.

या उपक्रमामुळे परिसराचे सौंदर्य वाढले असून नागरिकांनीही समाधान व्यक्त केले आहे. स्थानिक रहिवाशांनी या कार्याबद्दल आयोजकांचे कौतुक केले असून भविष्यातही असे उपक्रम नियमितपणे राबवावेत, अशी अपेक्षा व्यक्त केली आहे.

एकूणच, शिवजयंती निमित्त राबविण्यात आलेली ही मोहीम सामाजिक जबाबदारी, पर्यावरण जतन आणि सांस्कृतिक जाणीव यांचा उत्तम संगम ठरली असून समाजासाठी एक प्रेरणादायी आदर्श निर्माण करणारी ठरली आहे.