डाक विभागातील प्रशिक्षणार्थी कर्मचाऱ्यावर काळाचा घाला ; अपघातात दोघे ठार .!!! मयतात लोहा तालुक्यातील हळदव येथील २१ वर्षीय तरुणाचा समावेश

दैनिक चालु वार्ता उपसंपादक नांदेड -गोविंद पवार

मागील कांहीं महिन्यांपूर्वी गडचिरोली जिल्ह्यातील अहेरी तालुक्यात डाक विभागात नोकरीवर रुजू झालेल्या प्रशिक्षणार्थी दोघा तरुण कर्मचाऱ्यावर काळाने घाला घातला. अहेरी येथून दोघे सहकारी कर्मचारी मित्र दुचाकीवरून गडचिरोलीकडे जात असताना झालेल्या अपघातात दोघेही तरुण डाक कर्मचारी जागीच ठार झाले. मृतात लोहा शहरानजीक हळदव येथील २१ वर्षीय तरुण डाक कर्मचाऱ्याचा समावेश आहे. सदरील घटना दि. २८ रोजी सकाळी घडली.

लोहा तालुक्यातील हळदव येथील एकेविस वर्षीय धोंडीबा केशव पवार हा मागील चार ते सहा महिन्यांपूर्वी डाक विभागाच्या परीक्षेत उतीर्न होऊन गडचिरोली जिल्ह्यातील अहेरी तालुक्याअंतर्गत डाक कार्यालयात नोकरीवर रुजू झाला होता. अत्यंत हुशार व मनमिळाऊ असलेला धोंडीबा पवार याने इयत्ता दहावी परीक्षेत ९७ टक्के गुण संपादन करत यश मिळविले होते. घरची आर्थिक परिस्थिती बेताची असल्याने धोंडीबा याने नोकरीसाठी जाहिरात निघाल्यास अर्ज करण्यास सुरुवात केली होती. डाक विभागात विविध पदांसाठी जागा निघाल्या नंतर त्याने अर्ज करून परीक्षा दिली. पहिल्याच प्रयत्नात त्याने यश संपादन केले. डाक विभागातून निवड झाल्याचे आदेश आले तसे धोंडीबाच्या घरची मंडळी आनंदित झाली आणि पवार कुटुंबियांच्या अशा पल्लवित झाल्या. कांहीं दिवसातच धोंडीबा हा गडचिरोली जिल्ह्यातील अहेरी तालुक्यातील कम्मासुर डाक कार्यालयात प्रशिक्षणार्थी कर्मचारी म्हणून रुजू झाला. नोकरीस लागून चार ते सहा महिन्यांचा कालावधी पूर्ण झाला होता. गडचिरोली येथे डाक कर्मचाऱ्यांचे प्रशिक्षण असल्याने दि. २८ रोजी सकाळी अहेरी येथून कांहीं डाक कर्मचारी गडचिरोलीकडे प्रशिक्षणसाठी पाच ते सहा मोटारसायकलीवरून एकामागे एक असे आलापल्ली ते मुलचेरा रस्त्याने जात असताना एका वळणावर धोंडीबा व रवी यांच्या मोटारसायकलीस अज्ञात वाहनाने जबर धडक दिली. त्यात मोटारसायकल वरील धोंडीबा केशव पवार (२१) रा. हळदव ता. लोहा व सोबतचा परभणी येथील सहकारी कर्मचारी रवी किष्टे हे दोघे ठार झाले. याप्रकरणी अहेरी पोलिस ठाण्यात गुन्हा नोंदविण्याचे प्रक्रिया सुरू होती तर दि. २९ रोजी रात्री उशिरा मयत धोंडीबा पवार यांच्या पार्थिवावर हळदव येथे अंत्यसंस्कार करण्यात आले. त्याच्या पश्चात आई, वडील, दोन भाऊ, भावजय असा परिवार आहे.