दै चालु वार्ता 
सणासुदीच्या काळात आणि लग्नसराईत सोन्याच्या दागिन्यांची मागणी मोठ्या प्रमाणात होऊ लागते. दिवाळीनंतर आता तुळशी विवाह सुरू होताच लग्नसराईचा काळ सुरू होईल. दिवाळीपूर्वी सोन्याच्या दराने उच्चांक गाठला होता.
पण आता अचानक सोन्याच्या दरात घसरण सुरू झाली आहे. सोन्याच्या दरात सुरू असलेल्या या घसरणीमुळे लग्नसराईत सोने खरेदी करणे स्वस्त झाले आहे. इतकेच नाही तर येत्या काळात सोन्याच्या दरात आणखी घसरण होणार असल्याचा अंदाज वर्तवण्यात आला आहे.
सोने आणि चांदीच्या दरात सातत्याने घसरण होत आहे. भारतीय सराफा बाजारात ऑक्टोबर महिन्यात सोने आणि चांदीच्या दरात 6-6 टक्क्यांनी वाढ झाली होती. मात्र, नोव्हेंबर महिन्यात आतापर्यंत सोने आणि चांदीच्या दरात 4-4 टक्क्यांनी घसरण झाली आहे.
सोन्याचे दर आणखी गडगडणार?
HDFC Securities च्या अनुज गुप्ता यांच्या मते, टेक्निकली सोन्याचा ट्रेंड हा सध्या बेअरिश दिसत आहे. म्हणजेच घसरणीचा ट्रेंड आहे. फ्युचर्स मार्केटमध्ये एमसीएक्सवर सोन्याच्या डिसेंबर फ्युचर्ससाठी 74480 / 73500 रुपये प्रति 10 ग्रॅमचा सपोर्ट आहे. तर 75405 / 76080 रुपये प्रति 10 ग्रॅम रेजिस्टंस लेवल आहे.
सोन्याच्या दरात का होतेय घसरण?
केडिया अॅडव्हायझरीच्या अजय केडिया यांच्या मते, सोने आणि चांदीच्या किमतीत घसरण पहायला मिळत आहे. यामागचे कारण म्हणजे सातत्याने मजबूत होत असलेला डॉलर आणि कमकुवत जागतिक अर्थव्यवस्थेची चिंता आहे. चांदीचा दर एक महिन्याच्या निचांकी पातळीवर पोहोचला आहे. कारण, डॉलर सतत मजबूत होत आहे. तसेच चीनमध्ये जाहीर करण्यात आलेल्या मदत पॅकेजचा सुद्धा परिणाम दिसून येत आहे. अमेरिकेच्या धोरणांबाबतच्या अपेक्षा आणि चीनच्या आर्थिक आव्हानांचा परिणाम सुद्धा कमॉडिटी मार्केटमध्ये दिसून येत आहे.
देशांतर्गत वायदा बाजारात सोने आणि चांदीच्या किमतीत घसरण होत आहे. 12 नोव्हेंबर रोजी एमसीएक्सवर सोन्याचा दर 74912 रुपये प्रति 10 ग्रॅम होता. चांदीचा डिसेबंर वायदा 89251 रुपये प्रति किलो इतका आहे. बुधवारी सकाळी कॉमेक्सवर सोने आणि चांदीच्या किमती वाढल्या. सोन्याच्या दरात अर्धा टक्क्यांच्या वाढीसह 2617 डॉलर प्रति औंसवर ट्रेंड करत आहे. चांदीच्या किमतीत सुद्धा 1.25 टक्क्यांच्या वाढीसह 31 डॉलर प्रति औंसच्या आसपास ट्रेंड करत आहे.
