दै चालु वार्ता 
महायुतीने फक्त उद्धव ठाकरेंनाच डिवचलं; सेना भवनाबाहेर काय घडलं ?
राज्याच्या राजकारणात दोन दिवसांपूर्वी मोठी घडामोड घडली. मुंबईतील बेस्ट कर्मचारी सहकारी पतपेढीच्या निवडणुकी भारतीय जनता पक्षाचा दणदणीत विजय झाला.
ठाकरे गट आणि मनसेच्या संयु्क्त पॅनलचा पराभव झाला. ठाकरे बंधुंचा एकही उमेदवार विजयी होऊ शकला नाही. शशांक राव पॅनलने 14 तर महायुतीने 7 जागा जिंकल्या. बेस्टची निवडणूक मुंबई महापालिका निवडणुकीच्या (Mumbai News) आधीची लिटमस टेस्ट ठरली. यानंतर महायुतीकडून ठाकरे गटाला डिवचलं जात आहे. यातच आता शिवसेना भवनासमोरील एक बॅनर चर्चेत आला आहे.
बेस्ट पतपेढीच्या निवडणुकीत भाजपचा दणदणीत विजय झाला. आमदार प्रसाद लाड यांच्या नेतृत्वात भाजपने सात जागा जिंकल्या. तर शिवसेना ठाकरे गट आणि मनसेला एकही जागा जिंकता आली नाही. या विजयानंतर आता भाजपने बॅनरबाजी सुरू केली आहे. शिवसेना भवन परिसरात एक बॅनर लावण्यात आला आहे. यावर ठाकरे ब्रँड कोमात, स्वदेशी देवाभाऊ जोमात असा मजकूर लिहिण्यात आला आहे. या बॅनरच्या माध्यमातून ठाकरे बंधुंना टोला लगावण्यात आला.
विशेष म्हणजे या बॅनरमधून फक्त उद्धव ठाकरेंनाच डिवचण्यात आले आहे. कारण या फलकावर मनसे प्रमुख राज ठाकरे यांचा फोटो नाही. या माध्यमातून महायुतीचं आगामी राजकारण कसं असेल, मुंबई महापालिका निवडणुकांसाठी काय रणनिती असेल याचे संकेत मिळत आहेत. हा बॅनर दादरमधील शिवसेना भवना बाहेरच लावण्यात आला आहे.
या बॅनरवर मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, आमदार प्रविण दरेकर, प्रसाद लाड, रवींद्र चव्हाण, मंत्री आशिष शेलार यांचे फोटो आहेत. एका बाजूला उद्धव ठाकरे यांचा फोटो आहे मात्र राज ठाकरेंचा फोटो नाही. आता या बॅनरवर ठाकरे गटाकडून काय प्रतिक्रिया दिली जाते हे पाहणे महत्वाचे ठरणार आहे.
बेस्ट निवडणुकीत ठाकरेंना भोपळा
18 ऑगस्टला या निवडणुकीसाठी मतदान झालं होतं. मंगळवारी रात्री उशीरा या निवडणुकीचा अंतिम निकाल जाहीर झाला. यामध्ये ठाकरे बंधूंना मोठा झटका बसला. या निवडणुकीत फारशा चर्चेत नसलेले शशांक राव पॅनेलने कमाल करुन दाखवली. बेस्ट पतपेढीच्या एकूण 21 जागांसाठी ही निवडणूक झाली होती. यामध्ये शशांकराव पॅनलचे सर्वाधिक 14 उमेदवार विजयी झाले. तर, प्रसाद लाड, नितेश राणे आणि किरण पावसकर यांच्या (महायुती ) सहकार समृद्धी पॅनलचे 7 उमेदवार विजयी झाले.
