इगतपुरी तालुक्यात मानुसनोत्तर पावसाने शेतकऱ्यांचे अतोनात नुकसान.    भात, भाजीपाला पिकांचे मोठे नुकसान; शेतकऱ्यांवर आर्थिक संकटाचे सावट

इगतपुरी प्रतिनिधी :- विकास पुणेकर

इगतपुरी: गेल्या काही दिवसांपासून इगतपुरी तालुका व परिसरात पडत असलेल्या मानुसनोत्तर (ऑक्टोबर) पावसाने शेतकऱ्यांचे प्रचंड नुकसान झाले आहे. ऑक्टोबर महिन्यात एवढा मुसळधार पाऊस पडेल अशी अपेक्षा नसल्याने शेतकऱ्यांनी कापणीसाठी तयार ठेवलेली भातपिके, आणि भाज्यांचे उत्पादन यावर मोठा फटका बसला आहे. अनेक ठिकाणी पिके पाण्याखाली गेली असून भातकणसे कुजण्यास सुरुवात झाली आहे.तालुक्यातील इगतपुरी, घोटी,आडवण, मुंढेगाव, टाकेद,पिंपळगाव, वाडीवऱ्हे, या परिसरातील शेतकऱ्यांनी सांगितले की, पावसामुळे शेतीत पाणी साचून राहिल्याने पिकांची पूर्णपणे नासाडी झाली आहे. भाताचे उत्पादन कमी येणार असल्याने कुटुंबाच्या उदरनिर्वाहासह येणाऱ्या रब्बी हंगामासाठीही आर्थिक संकट उभे राहिले आहे.

काही ठिकाणी शेतकऱ्यांनी पिकांची कापणी सुरू केली असतानाच पावसाने जोर धरल्याने कापलेला भात वाळविण्यास सुद्धा अवकाश मिळाला नाही. परिणामी ओलसर भात कुजला असून शेतकऱ्यांच्या मेहनतीवर अक्षरशः पाणी फिरले आहे. भाज्यांच्या शेतांमध्ये टमाटे, मिरची आदी पिके पावसामुळे सडली आहेत व पावसाचा तडाखा बसला आहे.ग्रामीण भागात रस्ते चिखलमय झाल्याने शेतीमाल वाहतुकीवरही परिणाम झाला आहे. काही ठिकाणी शेतीचे बांध वाहून गेले असून शेतकऱ्यांच्या शिवारात पाणथळ झाल्याने मातीची धूप वाढली आहे.स्थानिक शेतकरी म्हणाले, “आम्ही वर्षभर कष्ट करून पिक उभं केलं, पण या अवकाळी पावसाने सर्व नासून गेलं. आता सरकारने तातडीने पंचनामे करून नुकसानभरपाई द्यावी, नाहीतर पुढील हंगाम कसा चालवायचा हा मोठा प्रश्न उभा राहिला आहे.”

दरम्यान, कृषी विभागाने प्राथमिक पाहणी सुरू केली असून नुकसानग्रस्त शेतकऱ्यांना दिलासा देण्यासाठी अहवाल तयार करण्याचे काम सुरू असल्याची माहिती मिळाली आहे.

🌾 शेतकऱ्यांच्या डोळ्यांत हताशेची छाया — भरपाईची प्रतीक्षा सुरू!

शासनाकडून तातडीने मदत मिळावी, अशी मागणी तालुक्यातील सर्वच शेतकरी वर्गातून होत आहे.