दैनिक चालु वार्ता 
दैनिक चालु वार्ता उस्माननगर प्रतिनिधी -लक्ष्मण कांबळे
नांदेड /उस्माननगर:- उस्माननगर ता. कंधार येथील सेवा सहकारी सोसायटी निवडणूक मतदान दि. २ फेब्रुवारी २०२३ ला होणार आहे. या निवडणुकीत दोन पॅनल व अपक्ष उमेदवार आमने-सामने उभे राहून दंड ठोकून उभे राहिल्याने तिरंगी लढतीमुळे निवडणुकीत एक प्रकारची चुरस निर्माण झाली आहे.
सविस्तर माहिती अशी की ,सर्व जिल्ह्यासह तालुक्याचे लक्ष वेधून घेणारी आणि अनेक उमेदवारांचे भवितव्य, अस्तित्व नाकारणारी उस्माननगर सेवा सहकारी सोसायटी निवडणूकीत भाजपप्रणीत नांदेड जिल्ह्याचे लोकप्रिय खा. प्रतापराव पाटील चिखलीकर पुरस्कृत विद्यमान चेअरमन तुकाराम वारकड गुरुजी यांचे शेतकरी विकास पॅनल व महाविकास आघाडी पुरस्कृत शेतकरी परिवर्तन पॅनल आणि लोकनेते कै. माधवराव पांडागळे राष्ट्रीय कॉग्रेस पुरस्कृत दोन अपक्ष उमेदवार असे प्रथमच आमने-सामने या निवडणुकीत उभे राहिले आहेत.
उस्माननगर सेवा सहकारी सोसायटी निवडणूकीसाठी एकूण तेरा जागा आहेत. उमेदवारी अर्ज भरताना ४९ जणांनी उमेदवारी अर्ज भरले होते. अर्ज उचलून घेण्याच्या तारखेला एकूण २६ जणांनी अर्ज ठेऊन त्यामधून काहीजनानी माघार घेऊन
अर्ज उचलून घेतले. एकास एक उमेदवार देण्यात आले. या निवडणुकीच्या नवीन यादीमध्ये अनेक जणांचे नाव वगळण्यात आले, तर काही जणांचे नाव समाविष्ट करण्यात आले आहेत. सोसायटीच्या निवडणुकीमध्ये उस्माननगर, तेलंगवाडी, कांजाळा, कांजाळातांडा ( वाडी) या गावाचा समावेश असून भावी चेअरमन कोणत्या गावाचा होणार यामध्ये मतभिन्नता आढळून येते. या निवडणूकीमध्ये स्थानिक काँग्रेस गटामध्ये बंडखोरी झाल्याने उमेदवार उभे केले होते. अर्ज उचलून घेण्याच्या तारखेला राष्ट्रीय कॉग्रेस पक्षाच्या एका गटाने अर्ज उचलून घेऊन केवळ दोनच उमेदवार उभे ठेवल्याने सोसायटीची निवडणूक रंगतदार अवस्थेत दिसून येत आहे. उस्माननगर सेवा सहकारी सोसायटीची निवडणूकीची जशी तारीख जवळ येत आहे. तसे निवडणूकीचे वातावरण तापत असून सभासदांना भेटणे, बैठकीचे आयोजन यावर भर असून, या निवडणुकीमध्ये मतदार राजा कुणाला मतदान करून निवडून देतो यांवर सर्व अवलंबून आहे.
उस्माननगर येथील सेवा सहकारी सोसायटीची निवडणूक ही आगामी होणाऱ्या स्थानिक स्वराज्य संस्थांच्या निवडणुकीची रंगीत तालीम आहे. या निवडणूकीमुळे स्थानिक राजकारणाची पितळ उघडे पडणार असल्याचे व आगामी निवडणुका चे राजकारण कार्यकर्ते यांचे संपुष्टात येते की काय ? अशी मतदारांमध्ये चर्चा होताना दिसत आहे.
