उदगीरमध्ये उमेदवारीचा सस्पेन्स शिगेला : आज शेवटचा दिवस, राजकीय हालचालींना वेग.  जि.प.–पं.स. निवडणूक २०२६ साठी आज अर्ज दाखल करण्याचा अंतिम दिवस; बंडखोरी, डमी उमेदवार व पक्षांतर्गत तणाव उफाळण्याची शक्यता

दैनिक चालु वार्ता वृत्तसेवा उदगीर, प्रतिनिधी-अविनाश देवकते

लातूर (उदगीर) : जिल्हा परिषद व पंचायत समिती सार्वत्रिक निवडणूक–२०२६ साठी उदगीर तालुक्यातील राजकीय वातावरण तापू लागले असून, आज नामनिर्देशन अर्ज दाखल करण्याचा शेवटचा दिवस असल्याने राजकीय हालचालींना निर्णायक वळण मिळण्याची चिन्हे आहेत.

आतापर्यंत दाखल झालेल्या नामनिर्देशनांकडे पाहता, अनेक गट व गणांमध्ये प्रमुख पक्षांनी अद्याप आपली अंतिम पत्ते उघडलेली नाहीत. बहुतांश ठिकाणी अधिकृत उमेदवारांऐवजी डमी किंवा राखीव उमेदवार पुढे करून परिस्थितीचा अंदाज घेण्याची सावध भूमिका घेतली असल्याचे स्पष्ट दिसते.

एकाच उमेदवाराची अनेक नामनिर्देशने : राजकीय दबाव तंत्र?

गट क्र. १३ (निडेबन), गट क्र. १६ (तोगरी) तसेच पंचायत समितीचे काही गण येथे एकाच व्यक्तीने वेगवेगळ्या पक्षांकडून किंवा अपक्ष म्हणून अनेक नामनिर्देशन अर्ज दाखल केल्याचे चित्र समोर आले आहे.

ही बाब केवळ तांत्रिक नसून,

▪️पक्षांकडून उमेदवारीबाबत चाललेली ओढाताण

▪️आणि उमेदवारांकडून पक्षश्रेष्ठींवर टाकला जाणारा दबाव

यांचे स्पष्ट द्योतक मानले जात आहे.

निरंक गण पक्षांसाठी डोकेदुखी

गण क्र. २१, २२, २८ व २९ हे गण आजअखेर निरंक राहणे हे पक्षांच्या संघटनात्मक कमजोरीकडे बोट दाखवणारे आहे. काही ठिकाणी योग्य उमेदवारांचा अभाव, तर काही ठिकाणी स्थानिक नेत्यांतील अंतर्गत वाद यामुळे पक्षांना उमेदवार उभा करता न आल्याचे राजकीय जाणकारांचे मत आहे.

________________________________________ ________________________________________

आज काय घडू शकते?

आज शेवटचा दिवस असल्याने —

▪️नाराज नेते व कार्यकर्ते अपक्ष म्हणून अर्ज दाखल करण्याची दाट शक्यता,

▪️पक्ष नेतृत्वाकडून ऐनवेळी उमेदवार बदल,

▪️आरक्षित व महिला जागांवर अचानक नव्या चेहऱ्यांचा प्रवेश,

▪️आणि काही मतदारसंघांत मैत्रीपूर्ण वाटणारी लढत थेट संघर्षात रूपांतरित होण्याची चिन्हे आहेत.

________________________________________

एकूण राजकीय चित्र

सध्या दिसणारी शांतता ही तात्पुरती असून, खरा राजकीय कस आज अर्ज दाखल होण्याच्या अंतिम टप्प्यात लागणार आहे.

नामनिर्देशन छाननीनंतर कोणते अर्ज टिकतात, कोण बाद होतात आणि कुठे बंडखोरी उघड होते, यावरच उदगीर तालुक्यातील निवडणुकीचे अंतिम चित्र स्पष्ट होणार आहे.