इंदुरीत भाजप उमेदवारांच्या प्रचाराचा दणदणीत शुभारंभ.भव्य रॅलीतून शक्तीप्रदर्शन

इंदुरीत भाजप उमेदवारांच्या प्रचाराचा दणदणीत शुभारंभ.भव्य रॅलीतून शक्तीप्रदर्शन

इंदोरी वराळे मतदार संघातुन अनकुल वातावरण आहे

मावळ प्रतिनिधी
बद्रीनारायण घुगे

इंदुरी : जिल्हा परिषद व पंचायत समिती सार्वत्रिक निवडणूक २०२६च्या पार्श्वभूमीवर भारतीय जनता पार्टीच्या अधिकृत उमेदवारांच्या प्रचाराचा शुभारंभ आज इंदुरी येथे मोठ्या उत्साहात आणि जल्लोषी वातावरणात झाला. सकाळपासूनच गावात राजकीय हालचालींना वेग आला होता. ढोल-ताशांचा गजर, घोषणांचा निनाद आणि कमळ चिन्हाने सजलेली उपरणी यामुळे इंदुरी गाव अक्षरशः भगवेमय झाले होते. भाजपने आजच्या प्रचाररॅलीतून निवडणुकीसाठी सज्ज असल्याचे स्पष्ट संकेत दिले.

प्रचाराच्या शुभारंभापूर्वी उमेदवारांनी इंदुरी गावचे आराध्य दैवत धर्मनाथ महाराज तसेच कडजाई माता यांचे दर्शन घेतले. देवदर्शनानंतर विजयासाठी आशीर्वाद मागत उमेदवारी अर्ज भरण्यासाठी भव्य रॅली काढण्यात आली. धार्मिक परंपरा आणि राजकीय संकल्प यांचा सुरेख संगम या प्रसंगी पाहायला मिळाला. ‘देवाच्या कृपेने आणि जनतेच्या पाठबळावर विजय निश्चित’ असा विश्वास उमेदवारांच्या चेहऱ्यावर झळकत होता.

या रॅलीत इंदुरी–वराळे जिल्हा परिषद गटाच्या उमेदवार सौ. मेघा प्रशांतदादा भागवत, वराळे पंचायत समिती गणाचे उमेदवार रवी निवृत्तीभाऊ शेटे तसेच इंदुरी पंचायत समिती गणाचे उमेदवार श्रीकृष्ण अण्णासाहेब भेगडे यांची प्रमुख उपस्थिती होती. उमेदवारांसोबत भाजपचे ज्येष्ठ पदाधिकारी, स्थानिक नेते, माजी लोकप्रतिनिधी तसेच असंख्य कार्यकर्ते सहभागी झाले होते. रॅलीतील शिस्तबद्ध सहभाग आणि मोठी गर्दी यामुळे भाजपची संघटनात्मक ताकद अधोरेखित झाली.

रॅलीदरम्यान इंदुरी गावातील सर्व वयोगटांतील नागरिकांचा उत्स्फूर्त सहभाग पाहायला मिळाला. महिला भगिनींनी पारंपरिक वेशात सहभाग नोंदवत रॅलीची शोभा वाढवली, तर युवक-युवतींनी घोषणा देत वातावरण अधिक भारावून टाकले. ज्येष्ठ नागरिकही या रॅलीत उत्साहाने सहभागी झाले होते. अनेकांच्या गळ्यात भाजपचे कमळ चिन्ह असलेली उपरणी झळकत होती, तर दुचाकी वाहनांवर भाजप आणि रिपब्लिकन पार्टी ऑफ इंडिया (रिपाई)चे झेंडे फडकत होते. रस्त्याच्या दुतर्फा उभे राहून ग्रामस्थांनी रॅलीचे स्वागत करत उमेदवारांना शुभेच्छा दिल्या.

यावेळी उमेदवारांनी उपस्थित जनसमुदायास अभिवादन केले. ‘गावाचा सर्वांगीण विकास, पारदर्शक कारभार आणि सामान्य माणसाला न्याय देणे हेच आमचे ध्येय आहे,’ असे मत उमेदवारांनी व्यक्त केले. केंद्र व राज्य सरकारच्या विविध विकासकामांचा उल्लेख करत, त्या योजनांचा लाभ तळागाळातील जनतेपर्यंत पोहोचवण्यासाठी जिल्हा परिषद आणि पंचायत समिती स्तरावर भाजपचे प्रतिनिधी असणे गरजेचे असल्याचे त्यांनी सांगितले. आगामी निवडणुकीत विजयासाठी त्यांनी नागरिकांकडे आशीर्वाद मागितले.

नागरिकांनीही उमेदवारांना उत्स्फूर्त प्रतिसाद देत जोरदार पाठिंबा दर्शविला. टाळ्यांच्या कडकडाटात आणि घोषणांच्या गजरात संपूर्ण परिसर दुमदुमून गेला होता. “कमळ चिन्हासमोरील बटन दाबून सर्व उमेदवारांना प्रचंड मतांनी विजयी करा,” असे आवाहन यावेळी करण्यात आले. भाजप आणि मित्र पक्षांच्या एकजुटीचा संदेश या कार्यक्रमातून देण्यात आला.

या कार्यक्रमास भाजपचे ज्येष्ठ पदाधिकारी, स्थानिक नेते, मंडल व बूथ स्तरावरील कार्यकर्ते मोठ्या संख्येने उपस्थित होते. सर्वांनी एकत्र येत आगामी निवडणुकीत भाजपला घवघवीत यश मिळवून देण्याचा निर्धार व्यक्त केला. गावागावात जाऊन मतदारांशी थेट संवाद साधण्यावर भर देण्यात येणार असल्याचेही यावेळी सांगण्यात आले.

उल्लेखनीय बाब म्हणजे, जिल्हा परिषद व पंचायत समिती सार्वत्रिक निवडणुकीसाठी मतदान गुरुवार दिनांक ०५ फेब्रुवारी २०२६ रोजी सकाळी ०७.३० ते सायं. ०५.३० वाजेपर्यंत होणार आहे. त्यासाठी सर्वच राजकीय पक्षांनी कंबर कसली असून प्रचाराची रणधुमाळी आता वेग घेताना दिसत आहे. इंदुरीतील आजच्या या भव्य रॅलीमुळे निवडणुकीतील वातावरण चांगलेच तापल्याचे चित्र स्पष्ट झाले आहे.