अनुभव, विश्वास आणि धनुष्यबाणाची ताकद; यमगे पंचायत समितीत विजय भोसले प्रचारात निर्णायक आघाडीवर

दै चालू वार्ता -कागल प्रतिनिधी-डॉ मोहन गोखले 

यमगे (ता. कागल) — यमगे पंचायत समिती मतदारसंघात सुरू असलेल्या निवडणूक प्रचारात शिवसेना (शिंदे गट) उमेदवार विजय भोसले यांनी ठोस आणि निर्णायक आघाडी घेतल्याचे चित्र सध्या स्पष्टपणे दिसून येत आहे. धनुष्यबाण या अधिकृत निवडणूक चिन्हावर ते ही निवडणूक लढवत असून, अनुभव, विश्वासार्हता आणि संघटनात्मक ताकद यांच्या जोरावर त्यांचा प्रचार वेग घेत आहे.

विजय भोसले यांनी यापूर्वी कागल पंचायत समितीचे उपसभापती म्हणून जबाबदारी यशस्वीपणे पार पाडली असून, त्या काळात त्यांनी प्रशासन, विकासकामे आणि सर्वसामान्य जनतेच्या प्रश्नांसाठी प्रभावीपणे काम केले आहे. पंचायत समितीच्या कामकाजाचा प्रत्यक्ष अनुभव आणि निर्णयक्षम नेतृत्व हीच त्यांची मोठी ताकद ठरत असून, मतदारांमध्ये त्यांच्याबाबत विश्वासाचे वातावरण निर्माण झाले आहे.

स्वर्गीय माजी खासदार सदाशिवराव मंडलिक यांचे ते अत्यंत विश्वासू व निष्ठावंत कार्यकर्ते म्हणून ओळखले जात होते. त्यांच्या राजकीय विचारांची, कार्यपद्धतीची आणि जनतेशी असलेल्या नात्याची परंपरा विजय भोसले पुढे नेत असल्याचे समर्थकांकडून सांगण्यात येत आहे. आजही त्या कार्यसंस्कृतीचा ठसा त्यांच्या प्रचारात स्पष्टपणे जाणवत आहे.

सध्या विजय भोसले हे माजी खासदार संजयदादा मंडलिक यांच्या मार्गदर्शनाखाली निवडणूक लढवत असून, त्यांच्या नेतृत्वामुळे प्रचाराला अधिक बळ मिळत आहे. शिवसेना शिंदे गटाचे कार्यकर्ते, पदाधिकारी आणि समर्थक मोठ्या संख्येने विजय भोसले यांच्या प्रचारात सक्रिय सहभागी झाले असून, गावोगावी धनुष्यबाण चिन्हाचा प्रचार प्रभावीपणे केला जात आहे.

प्रचारादरम्यान विजय भोसले यांनी ग्रामविकास, पाणीपुरवठा, रस्ते, आरोग्य, शिक्षण, शेतकरी प्रश्न, महिला बचत गट आणि युवकांच्या रोजगाराच्या मुद्द्यांवर ठोस भूमिका मांडली आहे. “अनुभवाच्या जोरावर काम करणारा आणि जनतेशी थेट संवाद साधणारा प्रतिनिधी” अशी त्यांची ओळख मतदारांमध्ये अधिक दृढ होत आहे.

गावागावातील प्रचार फेऱ्यांना मिळणारा उत्स्फूर्त प्रतिसाद, वाढती गर्दी, कार्यकर्त्यांचा जोश आणि मतदारांमधून व्यक्त होणारा सकारात्मक कौल पाहता विजय भोसले हे यमगे पंचायत समिती मतदारसंघात प्रचारात आघाडीवर असल्याचे राजकीय जाणकारांचे मत आहे. येणाऱ्या अंतिम टप्प्यात ही आघाडी निर्णायक विजयात रूपांतरित होण्याची शक्यता व्यक्त केली जात आहे.