धाडसी कारवायांनी कंधारला दिली सुरक्षिततेची नवी हमी एपीआय चंद्रशेखर जाधव साहेबांची कर्तबगारी ठळक

चालु वार्ता वृत्तसेवा कंधार प्रतिनिधी -अशोक पाटील तेलंग 

कंधार पोलीस स्टेशन येथे कार्यरत एपीआय चंद्रशेखर जाधव साहेब यांच्या नेतृत्वाखाली मागील आठ दिवसांत दोन महत्त्वपूर्ण आणि धाडसी कारवाया पार पडल्या असून, त्यामुळे कंधार तालुक्यात कायद्याचा धाक अधिक मजबूत झाल्याचे चित्र दिसून येत आहे.

पहिली कारवाई मंगनाळी येथे करण्यात आली. मिळालेल्या गोपनीय माहितीच्या आधारे जाधव साहेबांनी आपल्या पथकासह जुगार अड्ड्यावर अचानक छापा टाकला. या रेडमध्ये जुगार खेळणाऱ्या आरोपींना रंगेहात पकडण्यात आले. घटनास्थळावरून रोख रक्कम व जुगार साहित्य जप्त करण्यात आले असून संबंधितांवर कायदेशीर गुन्हा दाखल करण्यात आला आहे. या कारवाईमुळे अवैध जुगार व्यवसायाला मोठा आळा बसला आहे.

दुसरी उल्लेखनीय कारवाई म्हणजे गोहत्या करण्यासाठी नेत असलेल्या तीन कारवडी (गाईचे वासरू) पकडून त्यांची सुटका करणे होय. संशयास्पद हालचालींची माहिती मिळताच पोलिसांनी तत्परतेने सापळा रचून संबंधितांना अडवले. तीन कारवडींची सुरक्षित सुटका करण्यात आली असून आरोपींवर कायद्यानुसार कठोर कारवाई करण्यात आली आहे. या घटनेमुळे बेकायदेशीर कृत्यांना ठोस इशारा मिळाला आहे.

एपीआय जाधव साहेब पदभार स्वीकारल्यापासून गुन्हेगारी प्रवृत्तींवर प्रभावी नियंत्रण आले असून नागरिकांमध्ये सुरक्षिततेची भावना अधिक दृढ झाली आहे. त्यांच्या ठाम आणि निर्णायक भूमिकेमुळे कंधार तालुक्यात कायदा व सुव्यवस्था अधिक सक्षम झाल्याचे स्पष्ट दिसून येते.

स्थानिक नागरिकांच्या मते, “जाधव साहेब आल्यापासून कंधार अधिक सुरक्षित वाटू लागला आहे.” पोलिस प्रशासनावर वाढलेला विश्वास आणि गुन्हेगारांमध्ये निर्माण झालेली भीती हीच त्यांच्या कार्याची खरी ओळख ठरत आहे.

धाडस, तत्परता आणि कायद्याप्रती निष्ठा या गुणांच्या जोरावर एपीआय चंद्रशेखर जाधव साहेब हे कंधार पोलीस स्टेशनला लाभलेले एक अनमोल रत्न असल्याची भावना सर्वत्र व्यक्त होत आहे.