हडपसरमध्ये खळबळजनक घटना, कालव्यात अचानक सापडले काही मृतदेह

दैनिक चालु वार्ता, पुणे प्रतिनिधी – शाम पुणेकर.
पुणे : हडपसरच्या दिशेने वाहणाऱ्या नवीन मुळा-मुठा कालव्यात रविवारी दिवसभरात तीन मृतदेह आढळल्याने खळबळ उडाली. वैदूवाडी येथे दोन पुरुषांचे मृतदेह सापडले. तेथून काही अंतरावरच्या शिंदेवस्ती येथे एका तरुणाचा मृतदेह वाहत आला. हडपसर पोलिस आणि अग्निशामक दलाच्या जवानांनी घटनास्थळी धाव घेऊन तीन मृतदेह बाहेर काढले. यातील एकाची ओळख पटली असून, इतर दोघांची ओळख तपासण्याचे काम पोलिस करीत आहेत. या प्रकरणी हडपसर पोलिस ठाण्यात तीन व्यक्तींच्या आकस्मिक मृत्यूची नोंद करण्यात आली आहे
रविवारी सकाळी पावणेबारा वाजण्याच्या सुमारास वैदूवाडी वाहतूक शाखेच्या शेजारील कालव्यात साचलेल्या कचऱ्याभोवती दोन पुरुषांचे मृतदेह आढळले. अग्निशमन दलाचे केंद्रप्रमुख प्रमोद सोनवणे आणि जवानांनी मृतदेह बाहेर काढले. पोलीस पुढील तपास करीत आहेत.