देहूतील शिळा मंदिराचे पंतप्रधानांच्या हस्ते झाले उद्घाटन.

दैनिक चालु वार्ता पुणे प्रतिनिधी -शाम पुणेकर.

देहू : ज्या शिळेवर बसून तुकोबारायांनी १३ दिवस कठोर उपासना केली ती शिळा भक्ती आणि ज्ञानाची आधारशिळा असून, केवळ भक्तीचेच नव्हे तर भक्तीच्या शक्तीचे हे केंद्र आहे, अशा शब्दात पंतप्रधान नरेंद्र मोदी यांनी जगद्गुरू संत तुकाराम महाराजांप्रति आपला आदरभाव व्यक्त केला.

मंगळवारी दुपारी देहू येथील संत तुकाराम महाराजांच्या शिळा मंदिराचे लोकार्पण मोदी यांच्या हस्ते करण्यात आले. त्यावेळी ते बोलत होते. यावेळी उपमुख्यमंत्री अजित पवार, विरोधी पक्षनेते देवेंद्र फडणवीस, भाजप प्रदेशाध्यक्ष चंद्रकांत पाटील, संत तुकाराम महाराज संस्थानचे विश्वस्त व मान्यवर उपस्थित होते.

मोदी यांनी आपल्या भाषणाची सुरुवात मराठी अभंगांनी करताच उपस्थितांनी टाळ्यांच्या कडकडाटात त्यांना दाद दिली. मोदी यांनी आपल्या भाषणात तुकोबांच्या कार्याचा आढावा घेताना त्यांच्या अभंगांनी आणि त्यांच्या कार्याने समाज घडविण्याचे काम केले आहे तसेच तुकाराम महाराजांच्या विचार व शिकवणी प्रमाणेच आपल्या देश उन्नतीचे कार्य चालू आहे असे ते म्हणाले.