दैनिक चालु वार्ता 
दैनिक चालू वार्ता प्रतिनिधी देगलूर- संतोष मंनधरणे.
देगलूर:जिल्ह्यात श्री गणेश उत्सव ता. ३१ ऑगस्ट ते ता. नऊ
सप्टेंबर या कालावधीत डॉल्बी मालक, धारक तसेच गणेश
मंडळाचे पदाधिकारी यांनी त्यांच्या ताब्यातील डॉल्बी
सिस्टीम वापरात, उपयोगात आणण्यास प्रतिबंध आदेश
जिल्हादंडाधिकारी खुशालसिंह परदेशी यांनी काढला आहे.जिल्हादंडाधिकारी खुशालसिंह परदेशी यांनी फौजदारी प्रक्रिया संहिता १९७३ मधील कलम १४४ (एक) अन्वये ता. ३१ ऑगस्ट रोजी गणेशाचे आगमन ते ता. नऊ सप्टेंबर रोजी श्रीचे विसर्जन मिरवणूक संपेपर्यंत नांदेड जिल्ह्यात कोणत्याही डॉल्बी मालक, धारक तसेच गणेश मंडळाचे पदाधिकारी यांनी त्यांच्या कब्जातील डॉल्बी सिस्टीम वापरात, उपयोगात आणण्यास प्रतिबंध करण्यात आला आहे. या डॉल्बी मशीन व यंत्रसामुग्री संबंधितांनी स्वत:चे कब्जात सीलबंद स्थितीत ठेवावी. हा आदेश ता. ३१ ऑगस्ट रोजीच्या मध्यरात्रीपासून ते ता. नऊ सप्टेंबर रोजी रात्री बारा वाजेपर्यंत श्रीचे विसर्जन होईपर्यंतच्या कालावधीसाठी लागू राहील.डॉल्बीच्या आवाजामुळे व कंपनामुळे लहान मुले, ज्येष्ठ नागरिक तसेच आजारी व सामान्य नागरीक यांच्या कानास, हृदयास आरोग्यास, जीवीतास धोका होण्याची तसेच सामाजिक स्वास्थ बिघडण्यास व मालमत्तेस हानी पोहचण्याची शक्यता आहे. त्यामुळे सार्वजनिक शांतता व सुरक्षिततेस बाधा उत्पन्न होण्याची शक्यता असल्याने गणेश विसर्जन मिरवणुकीमध्ये डॉल्बी मालक, धारक यांच्यावर बंदी घालण्यात आली असल्याचेही आदेशात नमुद केले आहे.
