सर्व समाज घटकांना सोबत घेवून सर्वांगीण विकासाला प्राधान्य- क्रीडा व युवक कल्याण मंत्री संजय बनसोडे

उदगीर येथे जगदंबा बोधन देवी सभागृह, महर्षी वाल्मिकी भवनचे भूमिपूजन

दै.चालु वार्ता,

उदगीर, प्रतिनिधी

अविनाश देवकते

लातूर (उदगीर) : समाजातील प्रत्येक घटकाला सोबत घेवून विकास करण्याला आपण आजपर्यंत प्राधान्य दिले आहे. त्यानुसार उदगीर, जळकोट तालुक्यातील शहरी आणि ग्रामीण भागात मूलभूत सुविधांची निर्मिती आणि विविध विकासकामे करण्यात आल्याचे क्रीडा व युवक कल्याण मंत्री संजय बनसोडे यांनी उदगीर येथे बोलताना सांगितले.

उदगीर शहरातील बोधन नगर येथील जगदंबा बोधन देवी सभागृह आणि महर्षी वाल्मिकी भवनचे भूमिपूजन ना. बनसोडे यांच्या हस्ते झाले. प्रादेशिक परिवहन अधिकारी विजय चव्हाण, उपविभागीय अधिकारी सुशांत शिंदे, तहसीलदार राम बोरगावकर, नगरपरिषद मुख्याधिकारी सुंदर बोंदर, जिल्हा परिषदचे माजी अध्यक्ष राहूल केंद्रे, माजी नगराध्यक्ष राजेश्वर निटुरे, लातूरचे माजी नगराध्यक्ष व्यंकट बेंद्रे, मंदिराचे विश्वस्त नामदेव आपटे यावेळी उपस्थित होते.

समाजातील प्रत्येक घटकाचे प्रश्न, समस्या सोडवून त्यांना चांगल्या सुविधा उपलब्ध करून देण्यासाठी आरोग्य, दळणवळण, पाणी पुरवठा आदी विविध मूलभूत सुविधांची कामे करण्यावर आतापर्यंत भर देण्यात आला आहे. जगदंबा बोधन देवी सभागृहासाठी सुमारे ५५ लाख रुपये आणि महर्षी वाल्मिकी भवनासाठी ५३ लाख रुपये निधी मंजूर करण्यात आला आहे. हे काम रेखीव आणि गुणवत्तापूर्ण करण्याच्या सूचना दिल्या आहेत. आवश्यकता भासल्यास आणखी निधी देण्यात येणार असल्याचे ना. बनसोडे म्हणाले.

उदगीरसाठी स्वतंत्र उप प्रादेशिक परिवहन अधिकारी कार्यालय मंजूर झाले असून लवकरच हे कार्यालय कार्यान्वित होणार आहे. तसेच शहरातील भूमिगत गटार योजनेसाठी जवळपास ३८० कोटी रुपये निधी मंजूर झाला असून या कामाची निविदाही लवकरच निघेल. यासोबतच उदगीर, जळकोट तालुक्यातील विविध विकास कामांचे लोकार्पण येत्या काही दिवसांत होणार असल्याचे ना. बनसोडे यांनी सांगितले.

माजी जिल्हा परिषद अध्यक्ष श्री. केंद्रे, माजी नगराध्यक्ष श्री. निटुरे, श्री. बेंद्रे यांनी मनोगत व्यक्त केले. जगदंबा बोधन देवी मंदिराचे विश्वस्त नामदेव आपटे यांनी प्रास्ताविक केले.