सलग तीन दिवस शेअर बाजार बंद राहणार; काय आहे कारण..?

शेअर मार्केटमध्ये गुंतवणूक करत असाल तर तुमच्यासाठी ही बातमी महत्त्वाची आहे. गुरु नानक जयंती 15 नोव्हेंबरला आहे. याला गुरुपर्व असेही म्हणतात.

या दिवशी भारतासह जगातील अनेक देशांमध्ये गुरु नानक जयंती मोठ्या उत्साहात साजरी केली जाते. देशातील अनेक राज्यांमध्ये सरकारी कार्यालये बंद आहेत.

बीएसई आणि एनएसई शेअर बाजारात कधी सुट्ट्या असतात यासंबंधी वार्षिक कॅलेंडर जारी करतात. शेअर बाजार दर आठवड्याला शनिवार आणि रविवारी बंद असतो. याशिवाय राष्ट्रीय सुटी आणि विशेष प्रसंगीही बाजार बंद ठेवला जातो.

15 नोव्हेंबरला सुट्टी असेल की नाही?

बीएसई आणि एनएसईच्या अधिकृत वेबसाइटनुसार, गुरु नानक जयंतीनिमित्त 15 नोव्हेंबर रोजी शेअर बाजाराला सुट्टी असेल. या दिवशी कोणत्याही प्रकारचा व्यवहार होणार नाही.

अशा स्थितीत या आठवड्यात सलग तीन दिवस शेअर बाजार बंद राहणार आहे. गुरुनानक जयंतीनिमित्त शुक्रवारी कोणतेही कामकाज होणार नाही. यानंतर शनिवार आणि रविवारी बाजार बंद राहणार आहे.

शनिवार आणि रविवार व्यतिरिक्त या वर्षी आणखी दोन दिवस शेअर बाजार बंद राहणार आहे. 20 नोव्हेंबर आणि 25 डिसेंबर रोजी शेअर बाजारात कोणताही व्यवहार होणार नाही.

महाराष्ट्रात 20 नोव्हेंबरला विधानसभा निवडणुका होत आहेत. या दिवशी संपूर्ण महाराष्ट्रात मतदान होणार आहे. अशा स्थितीत शेअर बाजार पूर्णपणे बंद राहील. BSE आणि NSE वर कोणत्याही प्रकारची ट्रेडिंग होणार नाही. ख्रिसमसनिमित्त 25 डिसेंबर रोजी शेअर बाजाराला सुट्टी असेल.

गेल्या काही दिवसांपासून शेअर बाजारात घसरण सुरू आहे. आज बुधवारीही बाजारात घसरण झाली. दुपारी 1 वाजेपर्यंत सेन्सेक्स 500 अंकांपेक्षा अधिक घसरला होता. त्याच वेळी, निफ्टी देखील 170 पेक्षा जास्त घसरणीसह व्यवहार करत होता. गेल्या एका महिन्यात सेन्सेक्स 4.50 टक्क्यांहून अधिक घसरला आहे. निफ्टीतही महिनाभरात मोठी घसरण झाली आहे. निफ्टी 5.50 पेक्षा जास्त घसरला आहे.