18, 19 नोव्हेंबरला निवडणुकीसाठी राज्यातला सरकारी शाळा बंद? शिक्षण अधिकाऱ्यांनी थेटच सांगितलं..!

राज्यात विधानसभा निवडणुकीची रणधुमाळी सुरू आहे. सर्वच राजकीय पक्षांनी आपले आमदार निवडून द्यायला आणि विरोधकांना पाडायला कंबर कसलीये. तर, निवडणुकीचा कार्यक्रम सुरळीत पार पडावा यासाठी निवडणूक आयोगाकडून पूर्ण तयारी करण्यात आली आहे.

शिक्षण आयुक्तालयानं 18, 19 आणि 20 नोव्हेंबर रोजी शाळांना सुट्टी देण्याचा प्रस्ताव शिक्षण विभागाकडे सादर केला होता. त्यानंतर आता शिक्षण आयुक्तांनी स्वत: निवडणुकीच्या पार्श्वभूमीवर शाळांनी सुट्टी असेल की नसेल, हे स्पष्ट केलं आहे.

राज्यात 18 आणि 19 नोव्हेंबरला शाळा सुरूच राहणार आहेत. कोणतीही सार्वजनिक सुट्टी जाहीर केलेली नाही. केवळ ज्या शाळेतील सर्व शिक्षकांची नियुक्ती निवडणूक कामासाठी झाली असेल, एकही शिक्षक शाळेत उपलब्ध नसेल, तर संबंधित शाळांबाबत स्थानिक स्तरावर मुख्याध्यापकांनी त्यांच्या अधिकारात सुट्टी जाहीर करावी अशा सूचना आहेत, असं शिक्षण आयुक्त सूरज मांढरे यांनी सांगितलं आहे.

शिक्षण आयुक्तांच्या सूचनांवरून सर्व शिक्षकांची नियुक्ती निवडणूक कामासाठी झाली असेल अशा शाळा वगळता उर्वरित सर्व शाळा नियमितपणे सुरू राहतील, हे स्पष्ट आहे. दरम्यान, शिक्षण आयुक्तालयानं 18, 19 आणि 20 नोव्हेंबर रोजी शाळांना सुट्टी देण्याचा प्रस्ताव शिक्षण विभागाकडे सादर केला होता.

या अनुषंगानं शिक्षण विभागाचे उपसचिव तुषार महाजन यांनी परिपत्रकाद्वारे शिक्षण आयुक्तांना निर्देश दिले. त्यानुसार, राज्यात विधानसभा सार्वत्रिक निवडणूक 2024 सुरळीतपणे पार पाडण्यासाठी शिक्षकांच्या निवडणूक कर्तव्यामुळे ज्या ठिकाणी शाळा भरवणं शक्य नसेल, त्या ठिकाणी संबंधित शाळेच्या मुख्याध्यापकांनी शाळा बंद ठेवण्याबाबतचा निर्णय घेण्याबाबत आयुक्त स्तरावरून आवश्यक त्या सूचना देण्याबाबत नमूद करण्यात आलं. त्यानंतर या संदर्भात संभ्रम निर्माण झाल्याचं निदर्शनास आल्यानं शिक्षण आयुक्त सूरज मांढरे यांनी स्पष्टीकरण दिलं.