दै चालु वार्ता 
युवराज सिंगच्या वडिलांचा खुलासा
माजी भारतीय अष्टपैलू खेळाडू युवराज सिंगचे वडील आणि भारताचे आंतरराष्ट्रीय खेळाडू योगराज सिंग ( Yograj Singh) यांनी पुन्हा एकदा वादग्रस्त विधान केले आहे. या विधानानंतर योगराज सिंग सतत बातम्यांमध्ये येत आहेत.
खरंतर योगराज सिंग हे युट्यूबर समदीश भाटियाच्या पॉडकास्टवर दिसले होते. यावेळी, या दिग्गज अष्टपैलू खेळाडूच्या वडिलांनी त्यांचे विचार स्पष्टपणे मांडले. योगराज सिंग म्हणाले की, मुली त्यांच्या संपत्ती, पैसा आणि देखण्या चेहऱ्यामुळे त्यांच्या मागे लागत असत.
“आपण एका सेकंदासाठीही वेगळे झालो नाही…”
योगराज सिंह पुढे म्हणाले की, मला वाटले होते की माझ्या पत्नीला गाडी कशी चालवायची हे माहिती असेल, ती माझ्यासारखे कपडे घालेल आणि ती माझ्या कपाटातच तिचे कपडे ठेवेल. आम्ही एका सेकंदासाठीही वेगळे झालो नाही. जर मी क्रिकेटकडे झुकलो नसतो तर परिस्थिती वेगळी असती.
कपिल देव यांना मारण्यासाठी योगराज बंदूक घेऊन पोहोचले होते.
अनफिल्टर्ड बाय समदीश वर बोलताना योगराज सिंग (Yograj Singh) म्हणाले, ‘जेव्हा कपिल देव भारत, उत्तर विभाग आणि हरियाणाचे कर्णधार झाले तेव्हा त्यांनी मला कोणत्याही कारणाशिवाय संघातून वगळले. माझ्या पत्नीला वाटत होते की मी कपिल यांना प्रश्न विचारावा. मी तिला सांगितले, ‘मी या माणसाला धडा शिकवेन.’ मी माझी पिस्तूल काढली आणि सेक्टर ९ मधील कपिलच्या घरी गेलो. तो त्याच्या आईसोबत बाहेर आला. मी त्याला डझनभर वेळा शिवीगाळ केली. मी त्याला म्हणालो, ‘तुझ्यामुळे मी एक मित्र गमावला आहे आणि तू जे केलेस त्याची किंमत तुला चुकवावी लागेल.’
यामुळे योगराजने गोळी झाडली नाही
योगराज पुढे म्हणाले की, कपिल देवच्या आईमुळे त्यांनी गोळी झाडली नाही. योगराज पुढे म्हणाले, ‘मी त्याला (कपिल) सांगितले की ‘मला तुझ्या डोक्यात गोळी मारायची आहे, पण मी ते करणार नाही कारण तुझ्याकडे एक अतिशय पवित्र आई आहे जी इथे उभी आहे’. यानंतर योगराज आपल्या पत्नीसह परतले होते.
