शाळेत जाताना खाऊ देण्यासाठी बोलावलं अन् ; चौथीत शिकणार्‍या मुलीवर 27 वर्षाच्या नराधमाने केला अत्याचार, वाघोलीतील घटनेनं संताप

दैनिक चालु वार्ता प्रतिनिधी – स्वरूप गिरमकर .

( पुणे ) वाघोली : शाळेत जाण्यासाठी निघालेल्या चौथीतील मुलीवर 27 वर्षांच्या नराधमाने लैंगिक अत्याचार केल्याची घटना वाघोली परिसरात घडली आहे. या प्रकरणातील आरोपीला वाघोली पोलिसांनी अटक केली आहे. या घटनेमुळे वाघोली परिसरात खळबळ उडाली आहे. खाऊच्या आमिषाने नराधमाने चौथीच्या विद्यार्थ्यानीसोबत घृणास्पद कृत्य केलं आहे. वाघोलीत सोमवारी सकाळी आठ वाजण्याच्या सुमारास केसनंद रोडला हा प्रकार घडला आहे.

पोलिसांनी या प्रकरणी दिलेल्या माहितीनुसार, इयत्ता चौथीमध्ये शिक्षण घेणारी मुलगी सोमवारी सकाळी सात वाजण्याच्या सुमारास घरातून शाळेत जाण्यासाठी निघाली होती. शाळेत जाण्याच्या रस्त्यावर एक पिठाची गिरण आहे, त्या पिठाच्या गिरणीत कामाला असलेल्या 27 वर्षीय आरोपीने तिला अडवलं आणि तुला खाऊ देतो असं आमिष दाखवत आरोपीने पीडित मुलीला पिठाच्या गिरणीत घेऊन गेला आणि त्या ठिकाणी तिच्यावर लैंगिक अत्याचार केला.

काही वेळात गिरणीपासून काही अंतरावर पीडित मुलगी रडत होती. ते रस्त्यावरून जाणार्या येणार्या नागरिकांनी पाहिलं. त्यावेळी काही नागरिकांनी मुलीकडे विचारपूस केल्यावर तिने तिच्यासोबत घडलेला प्रकार सांगितला. त्यानंतर नागरिकांनी तात्काळ पोलिसांना याबाबत माहिती दिली. या घटनेची माहिती मिळताच पोलिस घटनास्थळी दाखल झाले. त्यांनी आरोपीला ताब्यात घेऊन त्यांच्याविरोधात गुन्हा दाखल केला. या प्रकरणाचा तपास वाघोली पोलिस करत आहेत.