दै चालु वार्ता 
मुख्यमंत्री देवेंद्र फडणवीस यांनी महायुतीतील मित्रपक्ष असलेल्या शिवसेना (शिंदे गट) आणि राष्ट्रवादी काँग्रेस (अजित पवार गट) यांच्या मंत्र्यांच्या वर्तनाबाबत तीव्र नाराजी व्यक्त केली आहे.
गेल्या काही दिवसांत शिवसेनेचे मंत्री संजय गायकवाड, संजय शिरसाट, राष्ट्रवादीचे मंत्री माणिकराव कोकाटे आणि गृहराज्यमंत्री योगेश कदम यांच्या कृतींमुळे निर्माण झालेल्या वादांवर फडणवीसांनी नाराजी व्यक्त केली आहे. सावली बार प्रकरणासह मंत्र्यांविरुद्ध दाखल झालेल्या तक्रारींमुळे फडणवीसांनी कठोर पावले उचलण्याची गरज असल्याचे मत मांडले आहे.
फडणवीसांनी उपमुख्यमंत्री एकनाथ शिंदे आणि अजित पवार यांच्याशी चर्चा करताना म्हटले, “मंत्र्यांच्या वर्तनाबाबत कारवाई न केल्यास ‘काहीही केलं तरी चालतं’ असा चुकीचा संदेश जाईल आणि कोडगेपणा निर्माण होईल. यासाठी काही कठोर निर्णय घ्यावेच लागतील.” त्यांनी महायुती सरकारच्या प्रतिमेला धक्का पोहोचवणाऱ्या घटनांवर तातडीने कारवाई करण्याची आवश्यकता अधोरेखित केली आहे.
महायुती सरकारमधील मंत्र्यांच्या वादग्रस्त वक्तव्यांमुळे आणि कृतींमुळे सरकार अडचणीत आले आहे. विशेषत: माणिकराव कोकाटे यांच्या फसवणूक प्रकरणातील दोषी ठरलेल्या घटनेने आणि बीडच्या सरपंच हत्याकांडात धनंजय मुंडेंच्या सहकाऱ्याच्या अटकेमुळे अजित पवार गटावर दबाव वाढला आहे. यामुळे फडणवीसांनी मंत्र्यांच्या वर्तनावर नियंत्रण ठेवण्यासाठी कठोर पावले उचलण्याची गरज असल्याचे स्पष्ट केले आहे.
