दै चालु वार्ता 
शिवसेना हा पक्ष आणि निवडणूक चिन्ह धनुष्य बाण याबाबत निवडणूक आयोगाने दिलेल्या निर्णयाविरोधात ठाकरे गटाने याचिका दाखल केली आहे. यावर आज सुप्रीम कोर्टात जवळपास दोन महिन्यांनी पुन्हा सुनावणी झाली.
सुप्रीम कोर्टाने या प्रकरणाची सुनावणी एक महिना लांबणीवर ढकलली आहे. शिवसेना पक्षाचं नाव आणि निवडणूक चिन्हासंदर्भात उद्धव ठाकरे यांच्या याचिकेवर आता येत्या १२ नोव्हेंबर रोजी सर्वोच्च न्यायालयात सुनावणी होणार आहे. या निर्णयामुळे ‘धनुष्यबाण’ कुणाचा, या प्रश्नाचे उत्तर मिळण्यासाठी आणखी काही काळ प्रतीक्षा करावी लागणार आहे.
निवडणूक चिन्ह आणि पक्षाबाबत ठाकरे गटाकडून सातत्याने सुप्रीम कोर्टाला तातडीने सुनावणी घेण्याची विनंती केली जात होती. या प्रकरणावर २० ऑगस्टलाच सुनावणी होणार होती.परंतु, या खंडपीठातील न्यायमूर्ती सूर्यकांता हे अन्य प्रकरणात घटनापीठात असल्याने त्या सुनावणीमुळे शिवसेनेची सुनावणी लांबणीवर पडली होती. त्यानंतर आजच्या सुनावणीत कोर्टाकडून महत्त्वाचे निर्देश दिले जातील अशी शक्यता वर्तवण्यात येत होती. मात्र, कोर्टाने १२ नोव्हेंबर ही सुनावणीची तारीख दिली.
शिवसेना हे पक्षाचं नाव आणि धनुष्यबाण हे निवडणूक चिन्ह एकनाथ शिंदे यांच्या गटाला देण्याच्या निवडणूक आयोगाच्या निर्णयाला आव्हान देणारी याचिका उद्धव ठाकरे यांनी सर्वोच्च न्यायालयात दाखल केली होती. या याचिकेवर न्यायमूर्ती सूर्यकांत, उज्जल भूयान आणि एन. के. सिंह यांच्या पीठासमोर आज सुनावणी झाली. ठाकरे गटाच्यावतीने अॅड. कपिल सिब्बल यांनी सुप्रीम कोर्टाला सांगितले की, जानेवारी महिन्यात स्थानिक स्वराज्य संस्थांच्या निवडणुका होणार आहेत. त्यामुळे या प्रकरणावर तातडीने सुनावणी झाली पाहिजे. यावर न्या. सूर्यकांता यांनी पुढील सुनावणी दिवाळीनंतर होणार असल्याचे सांगितले. दरम्यान, या प्रकरणातील प्रतिवाद्यांनी डिसेंबरमध्ये सुनावणी घेण्याची मागणी केली होती.
कोर्टातील सुनावणीनंतर अॅड. असीम सरोदे यांनी सांगितले की, “ज्येष्ठ विधिज्ञ कपिल सिब्बल यांनी सर्वोच्च न्यायालयाकडे आपल्याला युक्तिवादासाठी फक्त ४५ मिनिटे लागणार असल्याचे सांगितले. तर, समोरील पक्षकारांच्या वकिलांनी आम्हाला युक्तिवादासाठी ३ दिवस लागणार असल्याचे सांगितले. त्यामुळे आज न्यायालयाने तत्काळ सुनावणी दाखवण्याची तयारी दाखवली नाही.
अॅड. असिम सरोदे पुढे म्हटले की, “आम्हाला वाटत होतं की आजच अंतिम सुनावणी होईल. परंतु विरोधी पक्षाच्या वकिलांनी सांगितले की त्यांना तीन दिवस युक्तिवादासाठी लागतील. महापालिका निवडणुका जवळ आल्याने आम्ही सुनावणी लवकर घ्या अशी मागणी केली. त्यानंतर खंडपीठाने १२ नोव्हेंबर ही तारीख सुनावणीसाठी निश्चित केली.
