दै चालु वार्ता 
मनोज जरांगेंनी घेतला मोठा निर्णय…
मस्साजोगचे सरपंच संतोष देशमुख हत्या प्रकरणावरून आरोपाचा धुरळा उडवणारे भाजप आमदार सुरेश धस आता राष्ट्रवादीचे मंत्री धनंजय मुंडे यांच्या गुप्त भेटीमुळे अडचणीत सापडले आहे.
सुरेश धसांच्या या खेळीमुळे मनोज जरांगे कमालीचे संतापले आहे. त्यामुळे त्यांनी त्यांना भेटच नाकारली आहे.
भाजपचे आमदार सुरेश धस यांनी दोन दिवसांपूर्वी ज्यांच्यावर आरोपाचे वार केले, त्याच राष्ट्रवादीचे मंत्री धनंजय मुंडे यांची भेट घेतली. धनंजय मुंडेंच्या निवासस्थानी जाऊन सुरेश धस यांनी भेट घेतल्याचं उघड होताच सर्वत्र तीव्र संताप व्यक्त केला जात आहे. सुरेश धस यांनी तातडीने पत्रकार परिषद घेऊन स्पष्टीकरण दिलं. त्यानंतर ते मनोज जरांगे यांची भेट घेणार असल्याचं सांगितलं. पण मनोज जरांगे पाटील यांनी सुरेश धस यांना भेट नाकारली आहे. सुरेश धस आणि धनंजय मुंडे भेटीवर मनोज जरांगे कमालीचे नाराज झाले आहे.
मनोज जरांगे संतापले
मनोज जरांगे पाटील यांनी या मुद्द्यावरून सुरेश धस यांच्यावर निशाणा साधला आहे. ‘हे तर नवीन ऐकालाच मिळालं आहे, अवघड आहे. हे धक्कादायक आहे. गोरगरिब समाज न्यायाच्या प्रतिक्षेत आहे. एखाद्याकडून अपेक्षा करतोय, फालतूचं राजकारण व्हावं, हे अपेक्षित नाही. गोरगरिबांचं घर उन्हात पडलं आहे. हे बरोबर नाही, असं माझं वैयक्तिक मत आहे. धसांच्या विश्वासार्हतेला तडा केला, धसांवर राजकीय दबाव आला असेल. सुरेश धसांकडून ही अपेक्षा नव्हती. त्यांचं त्यांना लखलाभ. काय काय घडलं ते सगळं जनतेला सांगतील. परिस्थिती अशी आहे, सुरेश धस यांनी हे टाळायला हवं होतं’ असं म्हणत मनोज जरांगे यांनी आपली नाराजी बोलून दाखवली.
काय म्हणाले सुरेश धस?
मनोज दादा हे आमचे दैवत आहे, ते काही बोलले असतील. रागावले असतील पण मी त्यांच्याशी बोलून घेईन. त्यांची नाराजी दूर करेल, असं सुरेश धस म्हणाले.
