उपमुख्यमंत्री एकनाथ शिंदे यांचा ‘श्री संत तुकाराम महाराज पुरस्कारा’ने होणार सन्मान !

देहू संस्थानच्या अध्यक्षांची माहिती…

पिंपरी चिंचवड : १६ मार्च रोजी देहूनगरीत जगद्गुरू श्री संत तुकाराम महाराजांच्या ३७५ वा बीज सोहळा साजरा करण्यात येणार आहे. या पवित्र सोहळ्यात राज्याचे उपमुख्यमंत्री एकनाथ शिंदे यांना ‘श्री संत तुकाराम महाराज पुरस्कार’ प्रदान करण्यात येणार असल्याची घोषणा देहू संस्थानचे अध्यक्ष हभप पुरुषोत्तम महाराज मोरे यांनी केली आहे.

पालखी सोहळ्यात शिंदे यांनी दिंड्यांना आर्थिक सहाय्य, स्वच्छता मोहिम आणि इतर विविध सुविधा देण्याचा महत्वपूर्ण निर्णय घेतल्याबद्दल त्यांना ‘श्री संत तुकाराम महाराज पुरस्कार’ देऊन सन्मानित करण्यात येणार आहे.

शिंदे यांनी आषाढीवारी दरम्यान वारकऱ्यांच्या सेवा सुविधांसाठी घेतलेल्या विशेष प्रयत्नांची निर्मल वारी, हरित वारी संकल्पनेत दिलेल्या योगदानाची दखल घेऊन हा पुरस्कार प्रदान करण्यात येणार आहे. या पुरस्कारामध्ये शिंदे यांना वैभवी शाल, वीणा, चिपळ्या, पुष्पहार, संत तुकाराम महाराज मूर्ती, संत गाथा आणि सन्मानपत्र प्रदान करण्यात येणार आहे. उपमुख्यमंत्री एकनाथ शिंदे यांच्यापूर्वी माजी मुख्यमंत्री शरद पवार यांना हा पुरस्कार प्रदान करण्यात आला होता.

रविवारी १६ मार्च रोजी तीन वाजता काकड आरतीपासून बीज सोहळ्याला सुरूवात होणार आहे. या सोहळ्याची तयारी अंतिम टप्प्यात आली आहे.