ज्ञानाची शिदोरी घेऊन दहावीचे विद्यार्थी नव्या वाटेवर! दापका शाळेत दहावीच्या विद्यार्थ्यांचा भावनिक निरोप समारंभ!

दैनिक चालु वार्ता उदगीर प्रतिनिधी -अविनाश देवकते

उदगीर (सीमाभाग) :कमलनगर तालुक्यातील दापका येथील सरकारी माध्यमिक विद्यालयामध्ये दिनांक १८ मार्च २०२५ रोजी दहावीच्या विद्यार्थ्यांचा निरोप समारंभ उत्साहात संपन्न झाला. शाळेच्या प्रांगणात झालेल्या या कार्यक्रमात विद्यार्थी, शिक्षक, पालक आणि ग्रामस्थ मोठ्या संख्येने उपस्थित होते. हा दिवस विद्यार्थ्यांसाठी भावनिक आणि संस्मरणीय ठरला.

कार्यक्रमाच्या अध्यक्षस्थानी शाळेचे मुख्याध्यापक भानुदासराव वासरे होते. तसेच प्रमुख अतिथी म्हणून शालेय सुधारणा समितीचे अध्यक्ष अंकुशराव वाडीकर उपस्थित होते. व्यासपीठावर सेवानिवृत्त आदर्श मुख्याध्यापक विलासराव जाधव, शालेय व्यवस्थापन समितीचे सदस्य, गावातील प्रतिष्ठित नागरिक तसेच सर्व शिक्षक उपस्थित होते.

कार्यक्रमाची सुरुवात सरस्वती मातेच्या प्रतिमेचे पूजन करून करण्यात आली. त्यानंतर शाळेतील विद्यार्थिनींनी स्वागतगीत सादर करून उपस्थितांचे मन जिंकले. संजीव बिरादार यांनी प्रास्ताविक भाषण केले.

यानंतर मान्यवरांचा शाल, श्रीफळ आणि पुष्पगुच्छ देऊन सत्कार करण्यात आला. सत्कारमूर्त्यांमध्ये अरविंद बिरादार, सचिन शिंदे आणि शेख यांचा समावेश होता.

—

विद्यार्थ्यांचे मनोगत – भावनिक क्षण

दहावीच्या विद्यार्थ्यांनी आपल्या मनोगतातून शाळेतील आठवणी, शिक्षकांचे मार्गदर्शन आणि मिळालेल्या ज्ञानाबद्दल कृतज्ञता व्यक्त केली. “शाळेने आम्हाला ज्ञानाची शिदोरी दिली आहे, संस्कार दिले आहेत, हे आयुष्यभर आमच्या सोबत राहतील,” असे विद्यार्थ्यांनी सांगितले. मनोगत व्यक्त करताना अनेक विद्यार्थी भावनिक झाले होते.

मान्यवरांचे प्रेरणादायी मार्गदर्शन

सचिन शिंदे यांनी विद्यार्थ्यांना पुढील वाटचालीसाठी जिद्द, चिकाटी आणि संयम या गुणांचे महत्त्व समजावून सांगितले.

अरविंद बिरादार यांनी विद्यार्थी संगतीचे महत्त्व पटवून देत, “जीवनात विनम्रता आणि सद्गुण महत्त्वाचे आहेत,” असे मार्गदर्शन केले.

अंकुशराव वाडीकर यांनी शाळेच्या शैक्षणिक व भौतिक सुविधांविषयी बोलतांना, विद्यार्थ्यांना उज्ज्वल भविष्यासाठी शुभेच्छा दिल्या.

विलासराव जाधव यांनी आजच्या काळात विद्यार्थी आणि शिक्षक यांच्यातील जवळीक कमी होत आहे याकडे लक्ष वेधले. “शिक्षक हा विद्यार्थ्यांचा मित्र असतो,” असे त्यांनी सांगितले.

राजश्री कदम यांनी “निरोप” या शब्दाचा सखोल अर्थ उलगडून सांगत विद्यार्थ्यांना भावी वाटचालीसाठी शुभेच्छा दिल्या.

——————————————

या कार्यक्रमाला अनेक मान्यवर उपस्थित होते. त्यामध्ये संजीव पोतले, राम रावणगावे, राजकुमार बिरादार, विठ्ठल जिरगे, पंढरी भोसले, वसंत विलासपूरे, शेख मुख्तार, सौ. अर्चना शिंदे, अतिथी शिक्षिका ललिता भेंडे, सौ. स्नेहा बिरादार यांचा समावेश होता.

विद्यार्थी आणि पालक मोठ्या संख्येने उपस्थित होते. कार्यक्रमाच्या शेवटी विद्यार्थ्यांनी आपल्या शिक्षक आणि मित्र-मैत्रिणींना निरोप देताना भावना व्यक्त केल्या आणि सर्व शिक्षकांनी त्यांना यशस्वी भविष्यासाठी शुभेच्छा दिल्या.कार्यक्रमाची सांगता आनंदी आणि भावनिक वातावरणात झाली.