हर्षवर्धन पाटलांचा करेक्ट कार्यक्रम करण्याचा चंग…

इंदापुरात फडणवीसांनी मोठा मासा गळाला लावला !

पुणे : पुणे जिल्ह्यातील महत्त्वाच्या असणाऱ्या इंदापूरवर मुख्यमंत्री देवेंद्र फडणवीस यांचं विशेष लक्ष असल्याचं दिसत आहे. कारण विधानसभा निवडणुकीपूर्वी माजी मंत्री हर्षवर्धन पाटील यांनी भाजपची साथ सोडत शरद पवारांच्या पक्षात प्रवेश केल्यानंतर इंदापूर भाजपमध्ये मोठी पोकळी निर्माण झाली होती.

त्यानंतर इंदापुरात पुन्हा एकदा भाजपची ताकद वाढवण्यासाठी स्वतः फडणवीस मैदानात उतरले आहेत. पुणे जिल्हा परिषदेचे बांधकाम व आरोग्य विभागाचे माजी सभापती व सोनाई उद्योग समूहाचे संचालक प्रवीण माने यांना भाजपने गळाला लावलं आहे.

शुक्रवारी देवेंद्र फडणवीस हे पालखी सोहळ्यात ज्ञानेश्वर महाराजांच्या पादुकांचे दर्शन घेण्यासाठी पुण्यात आले होते. त्यावेळी रात्री उशिरा प्रवीण माने यांनी देवेंद्र फडणवीस यांची भेट घेतली आहे. या भेटीमध्ये प्रवीण माने यांच्यासोबत दौंडचे आमदार राहुल कुल हे सुद्धा उपस्थित होते. त्यासोबतच सोनाई उद्योग समूहाचे प्रमुख दशरथ माने, इंदापूर बाजार समितीचे माजी सभापती मयूरसिंह पाटील, बबन लावंड, अभिजित घोगरे, विजय घोगरे, महारुद्र पाटील, किसनराव जावळे हे नेतेमंडळी उपस्थित होती. त्यामुळे इंदापूरमध्ये भाजप जम्बो प्रवेशाच्या तयारीत असल्याचं समोर आल आहे.

प्रवीण माने हे भाजपकडून विधानसभा निवडणूक लढवण्यासाठी इच्छुक होते. मात्र, महायुतीमध्ये ही जागा अजित पवारांच्या राष्ट्रवादीला सुटल्यामुळे मानेंनी अपक्ष निवडणूक लढवली होती. यामध्ये त्यांना 38 हजार मतं मिळाली होती. इंदापूर तालुक्यात प्रवीण माने यांची मोठी ताकद आहे. त्यामुळे हर्षवर्धन पाटील यांनी भाजपला सोडचिठ्ठी दिल्यानंतर निर्माण झालेली पोकळी प्रवीण माने यांच्या रूपाने भाजप भरू इच्छित आहे. आता राहुल कुल यांच्यामार्फत प्रवीण माने हे भाजपच्या संपर्कात असून लवकरच मुंबईमध्ये त्यांचा प्रवेश सोहळा होणार असल्याची माहिती आहे.

दरम्यान, इंदापूर तालुक्यातील विविध विकासकामांवर चर्चा झाली असून, तालुक्याला आणखी जास्तीचा निधी देण्यासाठी प्रयत्न करणार असल्याचे मुख्यमंत्री देवेंद्र फडणवीस यांनी सांगितल्याचे प्रवीण माने यांनी सांगितले. तर, लवकरच देवेंद्र फडणवीस यांच्या अध्यक्षतेखाली इंदापूर येथे एक भव्य शेतकरी मेळावा सुद्धा पार पडणार असल्याची माहिती आहे. हा शेतकरी मेळावा प्रवीण माने यांच्या प्रवेशानंतर घेतला जाणार असून यावेळेस भाजपकडून मोठे शक्ती प्रदर्शन करण्यात येणार असल्याचे देखील माहिती आहे.

तर, हर्षवर्धन पाटील यांनी भाजप सोडल्यानंतर प्रवीण माने यांची देवेंद्र फडणवीस यांच्यासोबत जवळीक वाढली होती. विधानसभा निवडणुकीनंतर याचा प्रत्यय वारंवार आला. मुख्यमंत्रीपदाची शपथ घेतल्यानंतर पुणे जिल्ह्याच्या दौऱ्यावर असताना देवेंद्र फडणवीस हे त्यांचे कुलदैवत असणाऱ्या इंदापूर तालुक्यातील श्री क्षेत्र निरा नरसिंहपूर येथील लक्ष्मी-नरसिंह देवाच्या दर्शनासाठी आले होते. त्यावेळी प्रवीण माने हे फडणवीसांच्या स्वागतासाठी जातीने हजर होते. त्यासोबतच 10 एप्रिल रोजी सागर बंगल्यावर जात प्रवीण माने यांनी देवेंद्र फडणवीस यांना पुढील कारकिर्दीसाठी भेटून शुभेच्छा देखील दिल्या होत्या. त्यामुळे गेल्या कित्येक दिवसांपासून प्रवीण माने हे भाजपच्या संपर्कात असल्याचं स्पष्ट होत होतं.

मात्र, मानेंच्या प्रवेशाला काही मुहूर्त लागत नव्हता. आता मात्र दौंडचे भाजप आमदार राहुल कुल यांच्या मध्यस्थीनंतर मुंबईत प्रवीण माने यांचा मोठा प्रवेश सोहळा होणार असून यावेळी इंदापूर तालुक्यातील अनेक बडे नेते भाजपात प्रवेश करणार असल्याची माहिती खात्रीलायक सूत्रांनी दिली आहे.