दै चालु वार्ता 
सुनेत्रा पवारांचा बारामतीत शक्तिप्रदर्शनासह उमेदवारी अर्ज दाखल !
बारामती विधानसभा पोटनिवडणुकीसाठी उपमुख्यमंत्री सुनेत्रा पवार यांनी सोमवारी (दि. ६) जोरदार शक्तिप्रदर्शन करत उमेदवारी अर्ज दाखल केला. यावेळी महायुतीतील दिग्गज नेत्यांची उपस्थिती पाहायला मिळाली.
उपमुख्यमंत्री एकनाथ शिंदे, महसूलमंत्री चंद्रशेखर बावनकुळे, राष्ट्रवादीचे नेते सुनील तटकरे आणि प्रफुल्ल पटेल यांच्यासह महायुतीतील प्रमुख नेत्यांनी उपस्थित राहून पवार यांच्या उमेदवारीला बळ दिले.
उमेदवारी अर्ज दाखल करण्यापूर्वी सुनेत्रा पवार यांनी परंपरेनुसार धार्मिक आणि भावनिक स्थळांना भेट देत आशीर्वाद घेतले. सकाळी काटेवाडी येथील निवासस्थानी जाऊन त्यांनी दिवंगत उपमुख्यमंत्री अजित पवार यांच्या मातोश्री आशाताई पवार यांचे आशीर्वाद घेतले. त्यानंतर पुत्र पार्थ पवार आणि जय पवार यांच्यासमवेत श्रीक्षेत्र कन्हेरी हनुमान मंदिर येथे जाऊन मारुतीरायांचे दर्शन घेतले.
अजित पवार कोणतेही शुभकार्य सुरू करण्यापूर्वी हनुमंतांचे दर्शन घेत असत, ही परंपरा कायम ठेवत सुनेत्रा पवार यांनीही त्याच पावलावर पाऊल ठेवले. त्यानंतर भैरवनाथ मंदिर येथे जाऊन भैरवनाथ महाराजांचे दर्शन घेतले. यानंतर पवार कुटुंबीयांनी विद्या प्रतिष्ठान येथे जाऊन ‘अजितदादा’ यांच्या स्मृतिस्थळाला अभिवादन केले. तसेच बारामती शहरातील कसबा परिसरात छत्रपती शिवाजी महाराज आणि डॉ. बाबासाहेब आंबेडकर यांच्या पुतळ्यांना पुष्पहार अर्पण करून अभिवादन करण्यात आले.
महायुती आणि मित्रपक्षांच्या मेळाव्यानंतर उत्साहाच्या वातावरणात सुनेत्रा पवार यांनी अधिकृतपणे उमेदवारी अर्ज दाखल केला. या शक्तिप्रदर्शनामुळे बारामती पोटनिवडणुकीत महायुतीने आपली ताकद दाखवून दिल्याचे मानले जात आहे.
