दै चालु वार्ता हयात काँग्रेसमध्ये घालवलेला तगडा नेता भाजपच्या वाटेवर !
राज्यात काही महिन्यात स्थानिक स्वराज्य संस्थांच्या निवडणुका होणार आहेत. या निवडणुका जाहीर होण्यापूर्वी सर्वच राजकीय पक्षांनी आपला पक्ष मजबूत करण्यासाठी मोठ्या प्रमाणात इन्कमिंग सुरू केली आहे.
पुण्यात सुद्धा येत्या काही दिवसांमध्ये मोठे राजकीय उलथापालथ होण्याचे संकेत मिळत आहेत. याची सुरुवात पुण्यातील पर्वती विधानसभा मतदारसंघातून होण्याची शक्यता आहे. याच राजकीय उलथापालथीचे संकेत काल भारतीय जनता पक्षाचे ज्येष्ठ नेते चंद्रशेखर बावनकुळे यांनी दिले आहेत.
काल रात्री चंद्रशेखर बावनकुळे हे काँग्रेसमधून निलंबित असणारे नेते आबा बागुल यांच्या एका कार्यक्रमाला उपस्थित होते. यावेळेस त्यांनी आबा बागुल यांच्या भाजप प्रवेशाचे संकेत दिले आहेत. विधानसभा निवडणुकीपूर्वी आबा बागुल यांनी काँग्रेसमधून बंडखोरी करत अपक्ष निवडणूक लढवली होती. त्यामुळे आबा बागुल यांच्यावर पक्षाकडून कारवाई करण्यात आली होती. पक्षशिस्तीचा भंग केल्याप्रकरणी आबा बागुल काँग्रेसमधून निलंबित आहेत. त्यामुळे महापालिका निवडणुकीपूर्वी आबा बागुल हे भाजपमध्ये जाणार असल्याच्या चर्चा सुरू होत्या. या चर्चांवर आता खुद्द भाजपचे ज्येष्ठ नेते चंद्रशेखर बावनकुळे यांनी प्रतिक्रिया देत बागुल यांच्या प्रवेशाला ग्रीन सिग्नल दिला.
आबा बागुल माझ्याकडे मागेही एकदा आले होते ते परवा मुंबईला देखील आले होते. आज आबा बागुल यांच्याकडे केवळ आई महालक्ष्मी जगदंबेचे दर्शन घ्यायला आलो आहे, याचा कोणीही राजकीय अर्थ काढू नये. त्यांचं प्रेम आहे की चंद्रशेखर बावनकुळे यांनी त्यांच्या कार्यक्रमाला यावं असं त्यांना वाटतं. त्यांनी यासाठी कोणताही राजकीय संदर्भ दिला नाही. आमच्या नेत्या माधुरीताई मिसाळ इतक्या प्रगल्भ आहेत त्या कधीही कोणाच्याही पक्षामध्ये येण्याला विरोध करणार नाहीत. कारण त्या भारतीय जनता पक्षाच्या नेत्या आहेत भाजपाचे कार्यकर्ते कधीही कोणी पक्षात येईल त्याला नाही म्हणू शकत नाहीत. आमचा पक्ष वाढतो पक्ष वाढीसाठी कोणालाही स्थान आहे, कुणीही पक्षामध्ये येऊ शकतो. असं म्हणत एका प्रकारे बावनकुळे यांनी बागुल यांच्या प्रवेशाला ग्रीन सिग्नल दिला आहे.
दरम्यान, आबा बागुल यांनी विधानसभा निवडणूक ही माधुरी मिसाळ यांच्या विरोधात लढवली होती. 6 टर्म काँग्रेसमधून नगरसेवक असणारे आबा बागुल हे पुणे महानगर पालिकेचे उपमहापौर देखील राहिलेले आहेत. राजीव गांधी यांचे पुण्यातील विश्वासू म्हणून त्यांची ओळख होती. मात्र 30 वर्ष महापालिकेत नगरसेवक असणाऱ्या बागुल यांना विधानसभेचे तिकीट काँग्रेसकडून मिळाले नव्हते त्यामुळे संपूर्ण हयात काँग्रेसमध्ये घालवलेले आबा बागुल यांनी बंडखोरी केली होती. या बंडखोरीनंतर आबा बागुल यांच्यावर काँग्रेसने कारवाई करत त्यांना पक्षातून निलंबित केलं होतं.
आता बागुल यांचं पुनर्वसन भाजपमध्ये होणार का? आणि ज्या मिसाळ यांच्या विरोधात त्यांनी निवडणूक लढवली त्या बागुलांच्या प्रवेशाला हिरवा झेंडा देणार का? असे अनेक प्रश्न उपस्थित होत असताना बावनकुळे यांनी दिलेल्या प्रतिक्रियेमुळे बागुल यांच्या भाजप प्रवेशाचा रस्ता साफ झाल्याचं बोलले जात आहेत.
