वेटिंगवर असणारे अमोल मिटकरी पक्षाच्या ‘त्या’ निर्णयाने खुश; दिली नवी जबाबदारी…

आगामी निवडणुकीच्या पार्श्वभूमीवर अजित पवार गटाकडून जय्यत तयारी सुरु आहे. दोन दिवसांपूर्वी नवीन प्रवक्ते पदाची यादी जाहीर केली. आता स्टार प्रचारकांची यादी जाहीर करण्यात आली आहे. विशेष बाब म्हणजे, वेटिंगवर असणारे आमदार अमोल मिटकरी यांच्यावर उपमुख्यमंत्री अजित पवार यांनी महत्त्वाची जबाबदारी सोपवली आहे.

काही दिवसांपूर्वीच अजित पवार यांनी राष्ट्रवादी काँग्रेस संघटनेत भाकरी फिरवत अमोल मिटकरी, रुपाली ठोंबरे पाटील यांच्यासह आणखी दोन प्रवक्त्यांना पदमुक्त केले होते. त्यावेळी वादग्रस्त वक्तव्यांमुळे अजित पवारांनी मिटकरी यांची उचलबांगडी केल्याची जोरदार चर्चा रंगली होती. अमोल मिटकरी यांच्या वक्तव्यांमुळे महायुतीमधील पक्षांमध्ये कटुता निर्माण होते, अशी कुजबुज राजकीय वर्तुळात होती.

त्यावेळी मिटकरी यांनी “दुनिया दौडनेवालों की है लेकिन मंजिले सब्र वालों को मिलती है !”अशी पोस्ट करत प्रतिक्रिया व्यक्त केली होती. आता पक्षाने दिलेल्या नव्या जबाबदारीने मिटकरी भलतेच खुश झाले आहेत.

पक्षाने निर्णय देताच मिटकरी यांनी खास ट्विट करत आनंद व्यक्त केला आहे. “तुका म्हणे येथे न चाले तातडी l प्राप्त काळ घडी आल्यावीण ll अशा आशयाचे ट्विट करत त्यांनी आनंद व्यक्त केला. तसेच, विरोधकांनादेखील उत्तर दिले आहे.

स्टार प्रचारकामध्ये कोणा कोणाची निवड?

या स्टार प्रचारकांमध्ये राष्ट्रवादी काँग्रेसचे राष्ट्रीय अध्यक्ष आणि उपमुख्यमंत्री अजितदादा पवार, राष्ट्रीय कार्याध्यक्ष खासदार प्रफुल पटेल, प्रदेशाध्यक्ष खासदार सुनिल तटकरे, वैद्यकीय शिक्षणमंत्री हसन मुश्रीफ, माजी मंत्री धनंजय मुंडे, अन्न व औषध प्रशासन मंत्री नरहरी झिरवाळ, क्रीडामंत्री माणिकराव कोकाटे, सहकारमंत्री बाबासाहेब पाटील, मदत व पुनर्वसन मंत्री मकरंद पाटील, कृषीमंत्री दत्तात्रय भरणे, विधानसभा उपाध्यक्ष अण्णा बनसोडे, महिला व बालविकास मंत्री अदितीताई तटकरे, पर्यटन राज्यमंत्री इंद्रनील नाईक, माजी मंत्री धर्मरावबाबा आत्राम, माजी मंत्री अनिल भाईदास पाटील, माजी मंत्री संजय बनसोडे, आमदार प्रताप पाटील – चिखलीकर, माजी मंत्री नवाब मलिक, नेते सयाजी शिंदे, अल्पसंख्याक महामंडळाचे अध्यक्ष मुश्ताक अंतुले, माजी खासदार समीर भुजबळ, आमदार अमोल मिटकरी, आमदार सना मलिक – शेख, महिला प्रदेशाध्यक्षा रुपालीताई चाकणकर, आमदार इद्रीस नायकवडी, माजी आमदार अनिकेत तटकरे, माजी आमदार झिशान सिद्दीकी, माजी आमदार राजेंद्र जैन, मुंबई कार्याध्यक्ष सिध्दार्थ कांबळे, प्रदेश सरचिटणीस सुरज चव्हाण, लहू कानडे, ओबीसी सेलचे प्रदेशाध्यक्ष कल्याण आखाडे, सामाजिक सेलचे प्रदेशाध्यक्ष सुनिल मगरे, अल्पसंख्याक सेलचे प्रदेशाध्यक्ष नाझेर काझी, महेश शिंदे, श्रीमती राजलक्ष्मी भोसले, सुरेखाताई ठाकरे, नजीब मुल्ला, श्रीमती प्रतिभाताई शिंदे, विकास पासलकर आदींचा समावेश आहे.