दै चालु वार्ता 
शिवजयंती गाजवणारे ‘महाराज’ काळाच्या पडद्याआड; आरोपी फक्त…
मुंबई उपनगरातील विक्रोळी पार्कसाइट परिसरात राहणाऱ्या शिवसेना (उद्धव बाळासाहेब ठाकरे) पक्षाच्या पदाधिकाऱ्याचा खून झाल्याचा धक्कादायक प्रकार समोर आला आहे. ठाकरेसेनेचे पदाधिकारी सुरेंद्र पाचाडकर यांची घाटकोपर रेल्वे स्थानकाजवळील सीजीएस कॉलनी येथे एका क्षुल्लक कारणावरून झालेल्या वादातून हत्या करण्यात आली.
या प्रकरणी पोलिसांनी अटक केलेला आरोपी फक्त 19 वर्षांचा आहे. अमन श्रीराम वर्मा या तरुणाला पोलिसांनी बेड्या ठोकल्या आहेत.
गुरुवार 20 नोव्हेंबर रोजी सुरेंद्र पाचाडकर हे घाटकोपर रेल्वे स्थानक परिसरात फेरफटका मारत असताना आरोपी अमन वर्माचा त्यांना धक्का लागला. यातून झालेल्या शाब्दिक बाचाबाचीचे रूपांतर हाणामारीत झाले. त्यानंतर अमनने लोखंडी रॉडने सुरेंद्र पाचाडकरांच्या डोक्यात घातल्यामुळे त्यांचा मृत्यू झाल्याची माहिती आहे.
नेमकं काय घडलं?
मिळालेल्या माहितीनुसार, सुरेंद्र पाचाडकर हे गुरुवारी नेहमीप्रमाणे घाटकोपर रेल्वे स्थानक परिसरात फेरफटका मारण्यासाठी गेले होते. यावेळी घाटकोपर रेल्वे स्थानकाच्या शेजारी असलेल्या सीजीएस कॉलनीतून चालत जात असताना त्यांना १९ वर्षीय अमन वर्मा या तरुणाचा धक्का लागला. यावरुन त्यांच्यात शाब्दिक बाचाबाची झाली. याचे पर्यावसन हाणामारीत झाले. त्यावेळी अमनने जवळ पडलेला लोखंडी रॉड उचलून सुरेंद्र यांच्या डोक्यात घातला.यामुळे सुरेंद्र पाचाडकर यांच्या डोक्याला गंभीर दुखापत झाली आणि ते खाली कोसळले.
स्थानिकांनी याची माहिती घाटकोपर पोलिसांना देताच पोलीस तात्काळ घटनास्थळी दाखल झाले. त्यांनी जखमी अवस्थेत असलेल्या सुरेंद्र पाचाडकर यांना जवळच्या खासगी रुग्णालयात उपचारासाठी नेले, परंतु डॉक्टरांनी त्यांना मृत घोषित केले.
या प्रकरणी घाटकोपर पोलीस ठाण्याचे वरिष्ठ पोलीस निरीक्षक संतोष जाधव यांच्या मार्गदर्शनाखाली सह पोलीस निरीक्षक ज्ञानेश्वर खरमाटे यांच्या पथकाने आरोपीचा शोध सुरु केला. घटनेनंतर अवघ्या पाच तासांतच पोलिसांनी आरोपी अमन वर्मा याला अटक केली आहे. सुमारे 80 सीसीटीव्ही कॅमेऱ्यांचे फुटेज तपासल्यानंतर पोलिसांनी अमन वर्माचा माग काढला आणि त्याला रमाबाई कॉलनी येथून अटक केली.
कोण होते सुरेंद्र पाचाडकर?
सुरेंद्र पाचाडकर हे हिंदूहृदयसम्राट, शिवसेनाप्रमुख बाळासाहेब ठाकरे यांचे कट्टर शिवसैनिक म्हणून ओळखले जात असत. शिवसेना शाखेत ते नित्यनियमाने हजेरी लावत. लोकांशी संवाद साधून काम करणारा कार्यकर्ता म्हणून त्यांची विक्रोळी पार्कसाइट परिसरात ओळख होती. शिवजयंतीच्या कार्यक्रमात ते छत्रपती शिवाजी महाराज यांच्या वेशभुषेत चित्ररथावर उभे राहायचे. यामुळे त्यांना ‘महाराज’ या टोपणनावानेही ओळखले जाई. परंतु अत्यंत क्षुल्लक कारणावरून त्यांची हत्या झाल्याने लोकांत हळहळ व्यक्त केली जात आहे.
