निवडणुकीआधी नाशिकमध्ये 50 कार्यकर्त्यांचा भाजपला रामराम; राजकीय वर्तुळात खळबळ…

राज्यात नगरपरिषद आणि नगरपंचायतीच्या निवडणुकीसाठी सर्वच पक्ष जोमाने तयारी करत आहेत. अशातच, नाशिकच्या मनमाड शहरात भाजपला मोठा राजकीय धक्का बसला आहे. निवडणुकीच्या अगदी तोंडावर भाजपचे सुमारे 50 पदाधिकारी आणि कार्यकर्त्यांनी पक्षाची साथ सोडण्याचा निर्णय घेतला आहे.

या धक्क्यामुळे मनमाडमधील राजकीय वर्तुळात खळबळ उडाली असून, पक्षातील नाराजी उघडपणे समोर आली आहे.

मनमाड नगर परिषदेत गेल्या 25 वर्षांत भाजपचा एकही नगरसेवक निवडून आलेला नाही. या अपयशाबद्दल कार्यकर्त्यांनी नाराजी व्यक्त केली आहे. राजीनामा दिलेल्या भाजप कार्यकर्त्यांनी पक्षाच्या संघटनेकडून दुर्लक्ष आणि अन्याय होत असल्याचा आरोप केला आहे.

मनमाड नगर परिषदेच्या निवडणुकीत शिवसेना (शिंदे गट) आणि भाजप यांची युती झाली होती. या जागावाटपात भाजपला फक्त 4 जागा मिळाल्यामुळे स्थानिक पदाधिकाऱ्यांमध्ये तीव्र नाराजी होती. ज्यामुळे पदाधिकारी आणि कार्यकर्ते नाराज होते.

या सर्व घडामोडींमुळे मनमाडमधील भाजपची पक्षांतर्गत नाराजी आता उघडपणे समोर आली आहे. ऐन निवडणुकीच्या वेळी हा मोठा उलटफेर झाल्याने निवडणुकीच्या निकालावर नक्कीच मोठा परिणाम होण्याची शक्यता आहे.