दै चालु वार्ता 
भाजपमध्ये प्रवेश करणार ?
महापालिका निवडणुकीच्या तोंडावर मनसे प्रमुख राज ठाकरे यांना मोठा धक्का बसला आहे. जिल्हाध्यक्षाने आपल्या पदाचा राजीनामा दिला आहे. त्यामुळे निवडणुकीच्या तयारीत असलेले मनसे कल्याण-डोंबिवलीमध्ये बॅकफूटवर आली आहे.
मनसेचे जिल्हाध्यक्ष प्रकाश भोईर यांनी राजीनामा दिला असून ते भाजपच्या वाटेवर असल्याची चर्चा आहे.
मनसेचे जिल्हाध्यक्ष प्रकाश भोईर यांना आपल्या पक्षात घेण्यासाठी भाजपने हालचाली सुरू केल्या आहेत. काही दिवसांपूर्वी प्रकाश भोईर यांनी एका कार्यक्रमात भाजप प्रदेशाध्यक्ष रवींद्र चव्हाण यांची स्तुती केली होती. तेव्हापासून ते भाजपमध्ये जाणार अशी दबक्या आवाजात चर्चा होती. तसेच एकनाथ शिंदेंच्या शिवसेनेचा पर्याय देखील त्यांच्यासमोर आहे.
कल्याण-डोंबिवलीमध्ये भाजपने एकनाथ शिंदेंच्या शिवसेनेला सुरुंग लावला आहे. शिंदेंच्या पक्षातील पदाधिकारी फोडत असताना काही दिवसांपूर्वी त्यांनी उद्धव ठाकरेंचे जिल्हाध्यक्ष दीपेश म्हात्रे यांना फोडत आपल्या पक्षात घेतले होते. त्यानंतर आता मनसे जिल्हाध्यक्ष प्रकाश भोईर यांना देखील आपल्या पक्षात घेण्याच्या हालचाली सुरू केल्याने भाजप विरोधकांकडे लढण्यासाठी माणूसच शिल्लक ठेवत नसल्याचे बोलले जात आहे.
माजी आमदार भोईर भाजपात जाणार
शिवसेना उद्धव बाळासाहेब ठाकरे पक्षासोबत असलेले माजी आमदार सुभाष भोईर हे देखील पक्षाला जय महाराष्ट्र करण्याच्या तयारीत असल्याचे बोलले जात आहे. कारण मुख्यमंत्री देवेंद्र फडणवीस ठाणे जिल्ह्यात दोन दिवसांपूर्वी सभेला आले असताना त्यांचे स्वागत करण्यासाठी माजी आमदार सुभाष भोईर हे उपस्थिती होते. त्यामुळे भोईर हे भाजपमध्ये प्रवेश करणार असल्याची चर्चा सुरू झाली आहे.
