माजी केंद्रीय गृहराज्यमंत्री अन् ज्येष्ठ काँग्रेस नेते श्रीप्रकाश जयस्वाल यांचं निधन…

माजी केंद्रीय गृहराज्यमंत्री व काँग्रेस नेते श्रीप्रकाश जयस्वाल यांचं निधन झालं आहे. ते कानपूरमधून सलग तीनवेळा खासदार म्हणून निवडून आले होते.

तसेच मनमोहन सिंग यांच्या सरकारमध्ये त्यांनी 10 वर्षे केंद्रीय मंत्री म्हणून काम केले आहे.

दौलताबाद पोलीस ठाण्यातील महिला पोलीस कर्मचारी लाचलुचपत प्रतिबंधक विभागाच्या जाळ्यात

दौलताबाद पोलीस ठाण्यातील महिला पोलीस कर्मचारी लता बाळासाहेब दराडे यांना 20 हजारांची लाच घेताना लाचलुचपत प्रतिबंधक विभागानं घरीच रंगेहाथ पकडलं आहे. कारवाई न करण्यासाठी दराडे यांनी तरुणी आणि तिच्या मित्राकडे प्रत्येकी 10 हजार रुपयांची लाच मागितली होती. दोघांनी एसीबीकडे तक्रार केली असता महिला पोलिसाला अटक केली आहे.

स्थानिक स्वराज्य संस्थांच्या निवडणुकांचा मार्ग आता मोकळा, न्यायालयाने दिले निर्देश

स्थानिक स्वराज्य संस्थांच्या निवडणुकांचा मार्ग आता मोकळा झाला आहे. सर्वोच्च न्यायालयानं नगरपालिका, नगरपंचायत तसेच जिल्हा परिषद निवडणुका ठरलेल्या वेळापत्रकानुसार घेण्याचे आदेश दिले आहेत.या निवडणुकांना त्यांनी स्थगिती दिली नाही. याप्रकरणी पुढील सुनावणी 21 जानेवारी 2016 रोजी होणार आहे. यावेळी न्यायालयानं 40 नगरपालिका आणि 17 नगरपंचायतींमध्ये 50 टक्क्यांची आरक्षण मर्यादा ओलांडली आहे, तिथले निकाल कोर्टाच्या अंतिम निर्णयाच्या अधीन राहतील, असं म्हटलं आहे.

‘राज्यात सध्या सुरु असलेल्या निवडणुकीत पैशांचा धूर…’; उद्धव ठाकरेंचा घणाघात

माजी मुख्यमंत्री आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी महायुती सरकारवर जोरदार हल्ला चढवला आहे. ते म्हणाले, राज्यात सध्या सुरु असलेल्या निवडणुकीत पैशांचा धूर निघतोय. या सर्व राजकर्त्यांच्या वक्तव्यातून, वागणुकीतून सत्तेचा माज, पाहत आहे. जिथे जातात, तिथे पैशांच्या थैल्या उघडतात, मतं मागितली जातात हे चित्र भयानक आहे, असं ठाकरे यांनी म्हटलं.

वेळ आली की आम्ही शस्त्र हाती घेऊ

जैन समाज हा सनातनी हिंदू समाजाचा एक भाग आहे, पण निवडणुका आल्या की मराठीचा मुद्दा येतो, कबुतरांचा मुद्दा येतो. जैन समाजाची मंदिरं पाडली जातात, त्यामुळे वेळ आली की आम्ही शस्त्र हाती घेऊ असा पुनरुच्चार जैन मुनी निलेश चंद्र यांनी केला. कबुतरखान्याला जे लोक विरोध करतात ते मुंबईतील इतर कबुतरखान्यावर बोलत नाहीत, फक्त दादरच्या कबुतरखान्यावर विरोध करतात, असा आरोपही त्यांनी केला. देवेंद्र फडणवीस यांच्यासोबतचे काही नेते गद्दार आहेत, त्यांना आपण सोडणार नाही असेही निलेशचंद्र म्हणाले.

जनता मला या चक्रव्यूवातून बाहेर काढेल

महायुतीतील मित्रपक्षासह विरोधकाकडून मला चक्रव्यूवात अडकवण्याचा प्रयत्न केला जात आहे, पण मला विश्वास आहे, जनता मला या चक्रव्यूवातुन बाहेर काढेल, असा विश्वास माजी मुख्यमंत्री अशोक चव्हाण यांनी व्यक्त केला आहे. नांदेड येथील एका कार्यक्रमप्रसंगी बोलत होते.

संगमनेरमधील व्यापाऱ्याला दिली धमकी

राज्यात सध्या स्थानिक स्वराज्य संस्थांच्या निवडणुकीची धामधूम सुरू आहे. त्यामुळे राजकीय वातावरण तापलेले आहे. अशातच आता शिवसेनेचे अहिल्यानगर जिल्ह्यातील संगमनेरचे आमदार अमोल खताळ यांची एक वादग्रस्त ऑडिओ क्लिप सोशल मीडियावर व्हायरल झाली आहे. यात अमोल खताळ यांनी संगमनेरमधील व्यापाऱ्याला शिवीगाळ आणि धमकी दिल्याचे दिसत आहे. ही क्लिप व्हायरल झाल्यानंतर अनेकजण त्यांच्यावर टीका करताना दिसत आहेत. अमोल खताळ यांनी या ऑडिओ क्लिपमध्ये काय म्हटलं आहे ते जाणून घेऊयात.

रवींद्र चव्हाण यांचा आमच्या कुटुंबावर वैयक्तिक राग दिसतोय : नीलेश राणे

भाजपचे प्रदेशाध्यक्ष रवींद्र चव्हाण यांना सिंधुदुर्गात महायुती नको होती. त्यांना रत्नागिरीत युती चालते. पण सिंधुदुर्गा युती का नको, याची कारणं तरी सांगितली पाहिजेत ना? पण त्यांचा सिंधुदुर्ग, आमच्या कुटुंबावर रवींद्र चव्हाण यांचा राग दिसतो आहे. कारण त्यांचं वैयक्तिक भांडण वाटतं. कसंही झालं तरी नीलेश राणेंना आणि आमच्या उमेदवारांना पाडण्यासाठी प्रयत्न केले जात आहेत, असा आरोप आमदार नीलेश राणे यांनी केला.

गिरीश महाजनांचे आक्षेपार्ह विधान; ‘थकून भागून घरी गेला तर नवरा बायको मच्छरदाणीत झोपा’

बांधकाम कामगारांना पेट्या मिळाल्या का? त्यात काय काय आहे. बांधकाम कामगारांना ग्लोज दिले आहेत, त्यांना गमबूटही दिले आहेत. तसेच मच्छरदाणीही दिली आहे. थकून भागून घरी गेला तर नवरा बायको मच्छरदाणीत झोपा, असे आक्षेपार्ह विधान राज्याचे जलसंपदा मंत्री गिरीश महाजन यांनी केले.

तीन चार वर्षांपूर्वी मला जास्त केस हेाती; आता ती कमी झालीत : फडणवीस

समीर कुणावार यांचं मनापासून अभिनंदन करेन. आम्ही जेव्हा वर्धा जिल्ह्याला मेडिकल कॉलेज देण्याचा निर्णय केला. त्या वेळी जोपर्यंत मेडिकल कॉलेज आम्ही मंजूर करत नाही, तोपर्यंत समीरभाऊंनी आमचा पिच्छाच सोडला नाही. तुम्ही बघा तीन ते चार वर्षांपूर्वी मला जास्त केसं होती. पण आता कमी झाली आहेत, ती समीरभाऊंमुळेच कमी झाली आहेत, असे मजेशीर विधान मुख्यमंत्री देवेंद्र फडणवीस यांनी केले.

ज्याच्यामुळे माझं घर फुटलं, त्यानेच माझ्याशी बेईमानी केली : धनंजय मुंडे

माझा एक साथीदार अपघातात गंभीर जखमी झाला आहे. त्याच्यासाठी मी सगळं कामधंदा सोडून त्याच्याकडे गेलो. त्याचा जीव वाचला. तो माझ्याशी बेईमानी करू शकतो, तर तो जनतेसोबत काय इमानदार राहील. ज्याच्यामुळे माझं घर फुटलं, त्यांनीच आता माझ्याशी बेईमानी केली तर मी काय बोलणार. त्यांच्यावर काय बोलावं, त्यांनी तर मंदिरालाही सोडले नाही, असा आरोप माजी मंत्री धनंजय मुंडे यांनी केला.

राम खाडेंच्या पत्नीचा सुरेश धसावर गंभीर आरोप; हल्ले सुरेश धसच घडवून आणत आहेत

राम खाडेंवर यापूर्वी पंचायत समिती आणि आष्टीमध्ये दोनदा हल्ले झाले आहेत. खाडे हे गैरव्यवहार बाहेर काढत होते, त्यामुळेच त्यांच्यावर हल्ला घडवून आणले जात आहे. या हल्ल्यामागे आमदार सुरेश धस हेच आहेत. त्यांनीच हल्ल्याची ही घडवून आणली आहे. सुरेश धसांचे गैरव्यवहार बाहेर काढत असल्यामुळेच ते राम खाडेंवर हल्ले करत आहेत. यापूर्वी आमची बोलेरोही जाळण्यात आली आहे, असा आरोप राम खाडे यांच्या पत्नी तुळसा खाडे यांनी केला आहे.

मतदान केंद्र असलेल्या शाळांना 1 व 2 डिसेंबरला सुट्टी जाहीर

नगर परिषद व नगर पंचायतींच्या सार्वत्रिक निवडणुकी अनुषंगाने अहिल्यानगर जिल्ह्यातील 11 नगर परिषद व एका नगरपंचायतीमध्ये 2 डिसेंबरला मतदान, तर 3 डिसेंबरला मतमोजणी होणार आहे. मतदान केंद्र म्हणून नियुक्त सर्व शाळांना 1 व 2 डिसेंबरला सुट्टी जाहीर करण्यात आल्याचा आदेश जिल्हाधिकारी डॉ. पंकज आशिया यांनी काढले आहेत.

म्हणून लाडक्या बहीण योजनेचा जन्म!

“मी गरिबी पाहिली आहे. आईची, पत्नीची गरिबी पाहिली आहे. म्हणून मुख्यमंत्री लाडकी बहीण योजनेचा जन्म झाला. कोणीही मायका लाल आला, तरीही लाडकी योजना बंद होणार नाही. छोट्या योजनांमधून बहिणींना लखपती करायच्या आहे,” असे विधान उपमुख्यमंत्री एकनाथ शिंदे यांनी नाशिकच्या येवल्या इथल्या सभेत केले.

भाजप सरकारकडून ओबीसी समाजाची फसवणूक; काँग्रेसचे विजय वडेट्टीवार यांची टीका

सर्वोच्च न्यायालयाने स्थानिक स्वराज्य संस्थांच्या निवडणुकांना स्थगिती दिली नाही, हा थोडा दिलासा असला, तरी या निवडणुकांचा निकाल हा न्यायालयाच्या निर्णयाच्या अधीन राहणार आहे. त्यामुळे ओबीसींच्या जागांवर असलेली टांगती तलवार कायम राहणार आहे. आज न्यायालयाने निवडणूक प्रक्रिया सुरू करण्याचे निर्देश देताना, 50% आरक्षणाची मर्यादा ओलांडू नये, असे स्पष्ट निर्देश दिले आहेत. याचा अर्थ, ज्या ठिकाणी ओबीसी आरक्षणामुळे एकूण आरक्षण 50% च्या वर गेले आहे, त्या जागांवर निवडणूक होऊ शकणार नाही. त्यामुळे भाजपने ओबीसी आरक्षणासंदर्भातील केलेले सगळे दावे पूर्णपणे फोल ठरले आहेत. ही सपशेल बनवाबनवी आहे, अशी टीका काँग्रेसचे विजय वडेट्टीवार यांनी केली.

भाजपच्या रवींद्र चव्हाणांकडून 2 तारखेचा पुनरूच्चार

मालवणमध्ये भाजप पदाधिकाऱ्याच्या घरी शिवसेना आमदार नीलेश राणे यांनी रोख रक्कम पकडून दिल्यानंतर 2 तारखेपर्यंत युती टिकवायची आहे, असे म्हणणारे भाजपचे प्रदेशाध्यक्ष रवींद्र चव्हाण यांनी अकोल्यात बोलतांना पुन्हा 2 तारखेला सांगेल, असं म्हटलं आहे. त्यामुळे 2 तारखेची राज्याच्या राजकारणात उत्सुकता वाढली आहे. आज नाही, 2 तारखेपर्यंत थांबा. त्यामुळं 2 तारखेचा चमत्काराबद्दल काय? याबद्दल रवींद्र चव्हाण दोन तारखेला काय बोलणार, याकडे लक्ष लागलं आहे.

टॅक्स पावत्या बनवताना चुका होत नाही, मग मतदार याद्यात कशा चुका होतात?’

टॅक्स पावत्या बनवताना चुका होत नाही, मग मतदार याद्या बनवताना चुका कशा होतात, असा सवाल पिंपरी चिंचवड महापालिकेच्या आरपीआयच्या माजी नगरसेविका चंद्रकांत सोनकांबळे यांनी केला आहे. महापालिकेच्या निवडणूक विभागाने पिंपरी चिंचवड महापालिका निवडणुकीसाठी प्रारूप मतदार यादी प्रसिद्ध केली आहे. मात्र निडवूक विभागाने प्रसिद्ध केलेल्या मतदार यादीत मोठ्या प्रमाणात चुका आहेत.