अंबड मध्ये महसूल पथकाचा थरारक पाठलाग : बुलढाण्यातील ‘जुनी पावती’ दाखवून वाळू चोरीचा प्रयत्न फसला!. फिल्मी स्टाईलने हायवा पकडला; १५ लाखांचा मुद्देमाल जप्त करून फौजदारी गुन्हा दाखल

अंबड प्रतिनिधी ज्ञानेश्वर साळुंके 

जालना: जिल्ह्यात अवैध वाळू उपसा आणि वाहतुकीविरोधात प्रशासनाने कडक पावले उचलली आहेत. मंगळवारी मध्यरात्री अंबड-पाचोड रोडवर महसूल पथकाने फिल्मी स्टाईलने पाठलाग करून अवैध वाळू वाहतूक करणारा एक हायवा पकडला. विशेष म्हणजे, कारवाई टाळण्यासाठी चालकाने बुलढाणा जिल्ह्यातील जुनी पावती दाखवून प्रशासनाची दिशाभूल करण्याचा प्रयत्न केला, जो तहसीलदारांच्या सतर्कतेमुळे फसला. या कारवाईत १५ लाखांचा हायवा जप्त करण्यात आला असून चालकासह मालकावर गुन्हा दाखल करण्यात आला आहे.

नेमकी काय आहे घटना?

अंबडचे तहसीलदार विजय चव्हाण यांना अवैध वाळू वाहतुकीबाबत खात्रीशीर माहिती मिळाली होती. या माहितीच्या आधारे तहसीलदार चव्हाण, मंडळ अधिकारी प्रमोद काटकर आणि त्यांच्या पथकाने मंगळवारी (दि. ११) मध्यरात्री गस्त सुरू केली. घनसावंगी फाटा परिसरात एका विना क्रमांकाच्या पिवळ्या हायवावर पथकाला संशय आला. महसूल कर्मचाऱ्यांनी वाहन थांबवण्याचा इशारा केला, मात्र चालकाने वेग वाढवून अंधारात पळ काढला.

पाचोड रोडवर थरार

चालक हायवा जोरात पळवत असल्याचे पाहून महसूल पथकाने खाजगी वाहनाने त्याचा पाठलाग सुरू केला. सुमारे काही किलोमीटरच्या थरारक पाठलागानंतर, अंबड-पाचोड रोडवरील मार्डी फाट्याजवळ (शिरनेर शिवार) या हायवाला घेराव घालून थांबवण्यात यश आले. तपासणी केली असता, हायवामधून नुकतीच वाळू रिकामी केल्याचे स्पष्ट झाले.

तपासणीत उघड झालेली फसवणूक

पथकाने जेव्हा चालकाकडे कागदपत्रांची मागणी केली, तेव्हा धक्कादायक बाबी समोर आल्या:

जुनी आणि दुसऱ्या जिल्ह्याची पावती: चालकाने ४ फेब्रुवारी २०२६ ची रॉयल्टी पावती दाखवली. ही पावती बुलढाणा जिल्ह्यातील असून ती वाशिमच्या दिशेने वाहतुकीसाठी होती. अंबडमध्ये वाळू चोरी लपवण्यासाठी या जुन्या पावतीचा आधार घेतला जात होता.

चेसिस नंबरमध्ये फेरफार: वाहनाची ओळख पटू नये म्हणून हायवाच्या चेसिस नंबरवर खाडाखोड (Scratching) करण्यात आली होती. तसेच वाहनावर नंबर प्लेटही नव्हती.

प्रशासनाचा कडक बडगा

या प्रकरणी तहसीलदार कार्यालयाने १५ लाख रुपये किमतीचा हायवा जप्त केला आहे. वाहन चालक अर्जुन सुदाम राठोड (रा. वलखेड तांडा) आणि वाहन मालकाविरुद्ध अंबड पोलीस ठाण्यात विविध कलमान्वये गुन्हा दाखल करण्यात आला आहे.

“अंबड तालुक्यात वाळू माफियांची गय केली जाणार नाही. बनावट पावत्या किंवा विना नंबरची वाहने वापरून कायदा हातात घेणाऱ्यांवर दंडात्मक कारवाईसह फौजदारी गुन्हे दाखल केले जातील. प्रशासनाचे पथक २४ तास सतर्क आहे.”

— विजय चव्हाण (तहसीलदार, अंबड)

ही कारवाई जिल्हाधिकारी श्रीमती असीमा मित्तल यांच्या मार्गदर्शनाखाली तहसीलदार विजय चव्हाण, मंडळ अधिकारी प्रमोद काटकर व त्यांच्या पथकाने पार पाडली. या कारवाईमुळे वाळू माफियांमध्ये प्रचंड खळबळ उडाली आहे.