दैनिक चालु वार्ता 
दैनिक चालू वार्ता मुखेड प्रतिनिधी-संघरक्षित गायकवाड
मुखेड शहर सुंदर व स्वच्छ रहावे, यासाठी माजी जिल्हा परिषद सदस्य आंबेडकरी चळवळीचे नेते दशरथराव लोहबंदे व त्यांच्या परिवाराने पुढाकार घेऊन पानभोसी येथील एका संस्थेच्या माध्यमातून शहर स्वच्छ व सुंदर करण्याचे काम हाती घेतले आहे. शहरातील नाल्या, कचरा, रस्ता साफसफाईचे काम युद्धपातळीवर सुरू केले आहे.
मुखेड नगर परिषदेने गत पाच वर्षापासून हदगाव येथील एका माजी नगराध्यक्ष यांच्या संस्थेला शहराच्या साफसफाईचे काम दिले होते. महिना १४ लाख रुपये शहराच्या साफसफाईसाठी नगरपरिषद प्रशासन खर्च करीत होती. यातील ५० टक्के यंत्रणा नगरपालिकेची होती तरीही सदरील साफसफाई टेंडर मिळालेल्या या संस्थेने थातूरमातूर साफ सफाईचे काम करून दर महिना १४ लाख रुपयांची देयके नगरपालिका प्रशासन या संस्थेवर खर्च करत होते. तरीही शहरात घाणीचे साम्राज्य पसरले होते. अनेक नागरिकांनी व नगरसेवकांनी घाणीसंदर्भात तक्रारी प्रशासनाकडे केल्या होत्या. मात्र प्रशासनाने त्याकडे दुर्लक्ष केले होते. त्यामुळे नागरिकांना अनेक समस्यांना तोंड द्यावे लागत होते. दरम्यान हिमायतनगर येथील संस्थेचा कालावधी संपताच माजी जि. प. सदस्य दशरथराव लोहबंदे यांच्या परिवाराने शहरातील साफसफाईचा विडा उचलून ‘ना नफा ना तोटा’ या तत्त्वावर पानभोसी येथील एका संस्थेच्या माध्यमातून शहरातील स्वच्छतेचे काम हाती घेऊन मुखेड शहर आहे. स्वच्छ व सुंदर करण्याचा विडा उचलला आहे.
शहरातील मुख्य रस्ते, गल्ली, बोळातील नाली, रस्ते, घनकचरा उचलण्याचे काम हाती घेतले आहे. पावसाळ्यात रोगराई पसरू नये व नागरिकांना त्रास होऊ नये यासाठी प्रयत्नशील असून शहरात काही दिवसापूर्वी दिसत असलेले कचऱ्यांचे ढिगारे, तुंबलेल्या नाल्या सफाई काम युध्दपातळीवर सुरू असून याकडे स्वतः दशरथराव लोहबंदे हे लक्ष घातल्याने शहर सुंदर व स्वच्छ दिसत आहे.
