ठाणे महानगरपालिका सार्वत्रिक निवडणूक शांततेत पार पाडण्यासाठी प्रशासन सज्ज : आयुक्त सौरभ राव

ठाणे (24) : ठाणे महानगरपालिकेची सार्वत्रिक निवडणूक 2025-26 दि. 15 जानेवारी 2026 रोजी होत असून निवडणुकीसाठी ठाणे महापालिकेची संपूर्ण तयारी पूर्ण झाली असून शांततापूर्ण वातावरणात निवडणुका पार पाडण्यासाठी प्रशासन सज्ज झाले असल्याची माहिती आज झालेल्या पत्रकार परिषदेत निवडणूक अधिकारी तथा आयुक्त सौरभ राव यांनी दिली. निवडणूकीचा कार्यक्रम हा लोकशाहीचा उत्सव असून या उत्सवात सर्वांनी सहभागी होवून जास्तीत जास्त मतदान करावे असे आवाहनही त्यांनी यावेळी केले.

महापालिका मुख्यालयातील कै. नरेंद्र बल्लाळ सभागृहात झालेल्या पत्रकार परिषदेस अतिरिक्त आयुक्त 1 संदीप माळवी, अतिरिक्त आयुक्त 2 प्रशांत रोडे, उपायुक्त निवडणूक उमेश बिरारी, जी.जी. गोदेपुरे, मिताली संचेती, दीपक झिंजाड आदी उपस्थित होते.

निवडणूक कार्यक्रम

निवडणुकीसाठी सार्वजनिक सुट्टीचे दिवस वगळून 23 ते 29 डिसेंबर, 2025 (सकाळी 11 ते दुपारी 3) दि.30 डिसेंबर, 2025 (सकाळी 11 ते दुपारी 2) या कालावधीत नामनिर्देशन अर्जाचे वाटप व दाखल करता येणार आहे.‍ 31 डिसेंबर 2025 रोजी छाननी पूर्ण झाल्यानंतर लगेच वैधरित्या नामनिर्देशित झालेल्या उमेदवारांची यादी प्रसिध्द केली जाणार आहे. उमेदवारी मागे घेण्याचा दिनांक 2 जानेवारी 2026 असून 3 जानेवारी 2026 रोजी निवडणूक चिन्ह नेमूनदिले जाणार आहे. अंतिमरित्या निवडणूक लढविणाऱ्या उमेदवारांची यादी 03 जानेवारी रोजी प्रसिध्द केली जाणार आहे. 15 जानेवारी 2026 रोजी मतदान होणार असून 16 जानेवारी 2026 रोजी मतमोजणी होईल व त्यानंतर 19 जानेवारी 2026 रोजी निवडून आलेल्या उमेदवारांची यादी राजपत्रात प्रसिध्द केली जाणार असल्याची माहिती आयुक्त सौरभ राव यांनी दिली.

ठाणे महानगरपालिका सार्वत्रिक निवडणुकीसाठी एकूण प्रभाग 33 असून सन 2011 च्या जनगणनेनुसार लोकसंख्या 18,41,488 इतकी आहे. सर्वात जास्त लोकसंख्या असलेला प्रभाग क्र. 25 असून लोकसंख्या – 62,697 इतकी तर सर्वात कमी लोकसंख्या असलेला प्रभाग क्र. 29 असून लोकसंख्या – 38,172 इतकी आहे. एकूण मतदारांची संख्या 16,49,867 इतकी असून पुरूष मतदारांची संख्या 8,63,878 महिला मतदारांची संख्या – 7,85, 830 व इतर मतदारांची संख्या – 159 आहे.

निवडणूक प्रक्रियेसाठी अधिकारी कर्मचारी नियुक्त

ठाणे महापालिकेच्या 9 प्रभागसमितीनिहाय 11 निवडणूक निर्णय अधिकारी, सहायक निवडणूक निर्णय अधिकारी 1, 2,3 यांची नेमणूक करण्यात आली आहे. 33 प्रभागात एकूण 2013 मतदान केंद्रे असून प्रत्येक मतदान केंद्रावर मतदान केंद्राध्यक्ष, मतदान अधिकारी 1,2,3 व शिपाई यांच्या नेमणुका करण्यात येत असून 20 टक्के राखीव असे मिळून एकूण 12,650 अधिकारी व कर्मचाऱ्यांचे आदेश निर्गमित करण्याची कार्यवाही सुरू आहे. मतदान केंद्रावरील अधिकारी व कर्मचाऱ्यांचे प्रथम प्रशिक्षण दि. 27/12/2025 दि. 28/12/2025 व दि. 29/12/2025 या दिवशी राम गणेश गडकरी रंगायतन व डॉ. काशिनाथ घाणेकर नाट्यगृह येथे होणार आहे. दुसरे प्रशिक्षण निवडणूक निर्णय अधिकारी यांचे स्तरावर घेतले जाणार आहे.

निवडणूक कामकाजासाठी आवश्यक यंत्रणा कार्यान्वित

ठाणे महानगरपालिका सार्वत्रिक निवडणुकीच्या कामकाजाच्या अनुषंगाने 120 वाहने उपलब्ध केली आहेत. सी.सी.टिव्ही व वेबकास्टिंग सुविधा, विद्युत व्यवस्था, इलेक्ट्रॉनिक मतदान यंत्रे (7500 BU + CU), इंटरनेट व संगणक प्रणाली उपलब्धतता, चहापान भोजनव्यवस्था, मतदान जागृती व प्रसिध्दी व्यवस्था, मतपत्रिका व स्टेशनरी छपाई साठी आवश्यक तो कर्मचारी वर्ग उपलब्ध करण्यात आला आहे.

एक खिडकी योजना

प्रत्येक प्रभाग समिती कार्यालयांमध्ये एक याप्रमाणे एकूण 9 व ठाणे महापालिका मुख्यालयातील नागरी सुविधा केंद्र येथे 1 अशा एकूण 10 खिडक्या उघडण्यात आल्या असून या एक खिडकी योजना येथून निवडणुकीसाठी आचार संहिता कालावधीत उमेदवार/ राजकीय पक्ष यांना सभा /प्रचारा करिता सभेची परवानगी, सभा घेण्यासाठी मैदानाची परवानगी, ध्वनीक्षेपक परवानगी, रॅली,बोर्ड-बॅनर लावण्याची परवानगी, पक्ष कार्यालये उघडण्याची परवानगी, थकबाकी नसल्याचा दाखला, शौचालय वापर दाखला, ठेकेदार नसल्याचा दाखला, मतदार यादीचा उतारा इत्यादी दाखले/प्रमाणपत्रव इतर परवानग्यांची मागणी, अग्निशमन विभाग, स्थानिक पोलीस स्टेशन व वाहतूक विभाग या सर्व विभागांचे ना-हरकत दाखले उपलब्ध होणार आहेत.

राजकीय पक्षांची बैठक

निवडणूकीसंदर्भात राजकीय पक्षांची बैठक दिनांक 20 डिसेंबर 2025 रोजी महापालिका भवन येथे घेण्यात आली असून त्यांना निवडणूक प्रक्रियेबद्दल सविस्तर माहिती देण्यात आली असून राजकीय पक्षांच्या प्रतिनिधींना असलेल्या शंकांचे निरसन करण्यात आले असल्याचे आयुक्तांनी नमूद केले.

अनधिकृत पोस्टर्सवर कारवाई

आचार संहिता लागू झाल्यापासून ठाणे शहरातील 3778 अनधिकृत पोस्टर्स महापालिकेच्या अतिक्रमण विभागामार्फत हटविण्यात आले. तसेच लोकप्रतिनिधींची नावे असलेल्या विकासकामांच्या कोनशीला झाकण्याची कार्यवाही महापालिकेच्यावतीने करण्यात आली.

मतदान केंद्र

मतदान केंद्रावर दिव्यांग मतदारांसाठी व्हीलचेअर तसेच रॅम्पची सोय करण्यात आली आहे. प्रत्येक प्रभागात एक याप्रमाणे 33 आदर्श मतदान केंद्र तयार करण्यात येणार आहे. तसेच पूर्णत: महिलांचे असे सखी मतदान केंद्र प्रत्येक प्रभागात तयार करण्यात येणार आहे.

पोलीस बंदोबस्त

प्रत्येक झोननिहाय अंदाजे 5,500 इतका पोलीस बंदोबस्त तैनात असेल. प्रत्येक मतदान केंद्र, संवेदनशील मतदान केंद्र, मतदान केंद्रापासून 200 मीटरवर पोलीस तैनात असणार आहे. प्रत्येक महसूल सेक्टर ठिकाणी 1 पोलीस कर्मचारी, तसेच पोलीसांचे जे सेक्टर असतील त्याठिकाणी एक अधिकारी 4 कर्मचारी तसेच पोलीसांचे वाहन असेल. संवेदनशील ठिकाणी एसआरपी किंवा राज्य राखीव दल, पोलीस मित्र, एन.एस.एस., एन.सी.सी चे विद्यार्थ्यांचा समावेश असणार आहे. प्रत्येक SST, FST साठी पोलीस कर्मचारी तैनात, प्रत्येक झोनमध्ये असणाऱ्या चेकनाक्यावर पोलीस बंदोबस्त असणार आहे. स्ट्राँग रुमच्या ठिकाणी 1 अधिकारी 2 कर्मचारी हे ‍ शिफ्टमध्ये बंदोबस्तासाठी असणार असल्याचे आयुक्त सौरभ राव यांनी नमूद केले.