खड्ड्याचाअंदाज न आल्याने ऑटो पडला खड्ड्यात

दैनिक चालु वार्ता नांदुरा प्रतिनिधी- किशोर वाकोडे

बुलढाणा: दि.८.तालुक्यातील अफजलपुर वाडी या गावी जाण्यासाठी मुख्यमंत्री ग्रामसडक योजना अंतर्गत नवीन रस्ता व पैनगंगा नदीवर नवीन पुलाचे बांधकाम सुरू आहे . पुलाच्या या नवीन बांधकामा जवळच बुलढाणा-अजिंठा या राष्ट्रीय महामार्गाच्या कामासाठी नदीचे खोलीकरण करून गौण खनिज वापरण्यात आले होते . रस्त्याच्या शेजारी नदीत खोल खड्डा पडलेला आहे . मुसळधार पाऊस पडल्यामुळे खड्ड्याचा अंदाज न आल्याने अफजलपुरवाडी कडे जात असलेला एक ऑटो या खड्ड्यात पडला. या ऑटो मध्ये देऊळघाट येथील चालक शेख फरहान शेख आवेस पूर्ण बुडाले होते . ही घटना लक्षात येताच त्या ठिकाणी हजर नागरिकांनी धाव घेऊन ऑटो चालकाला बाहेर काढले व नंतर ऑटो ही पाण्याबाहेर काढण्यात आला आहे . सुदैवाने यात जीवित हानी झाली नाही . संबंधित पुलाच्या बांधकामा जवळ दोन्ही बाजूने सेफ्टी गार्ड लावण्यात यावे जेणेकरून भविष्यात अनुचित घटना घडणार नाही , अशी मागणी स्वाभिमानी शेतकरी संघटनेचे बुलडाणा तालुका अध्यक्ष आकाश माळोदे यांनी केली आहे.