बिबट्याच्या हल्ल्यात अजून एक वृद्ध महिला ठार. तीन महिन्यापासून वैजापूर तालुक्यात भीतीचेच वातावरण

दैनिक चालु वार्ता वैजापूर प्रतिनिधी -भारत पा सोनवणे 

वैजापूर (छत्रपती संभाजीनगर:-तालुक्यातील जिरी येथील वयोवृद्ध महिला घरासमोर उभी असताना अचानक बिबट्याने हल्ला केला. या झटापटीत बिबट्याने या महिलेला जवळपास १०० मीटर अंतरावर फरपटत नेले, अखेरी या हल्ल्यात तिचा जागेवरच दुर्दैवी मृत्यू झाला. झुंबरबाई माणिक मांदाळे (वय ६५) जिरी असे मृत महिलेचे नाव आहे. मानवावर बिबट्याने हल्‍ला केल्‍याची या परिसरातली ही जवळपास दहावी घटना आहे. दोन दिवसांपूर्वी देखील याच परिसरातल्या वळण गावात घरासमोर खेळत असणाऱ्या तीन वर्षाच्या मुलीचा देखील बिबट्याच्या हल्ल्यात मृत्यू झाला होता, तर दोन महिन्यापूर्वी सहा वर्षाचा मुलगा आईसोबत शेतात गेला होता. त्या मुलावर देखील बिबट्याने हल्ला केल्याने तो देखील जागेवर ठार झाला होता. अनेक जनावरांवरती हल्ला केल्याने अनेक जनावरे देखील दगावली आहेत.

त्यामुळे या परिसरातील गावकर्‍यांमध्ये भीतीचे वातावरण निर्माण झाले आहे. जोपर्यंत बिबट्या जेरबंद होत नाही तोपर्यंत या महिलेवर अंतिम संस्कार करणार नाही असा पवित्र नागरिकांनी घेतला आहे. नागरिक आक्रमक होताना पाहायला मिळत आहे. तर घटनेला सात ते आठ तास उलटले असली तरी वनविभागाचे कुठलेही कर्मचारी घटनास्‍थळी दाखल झालेले नाहीत.