देगलूर जुना बसस्थक बनले होल्डिंग, बॅनरचे माहेरघर; एसटी महामंडळाचे सर्रास दुर्लक्ष

दैनिक चालू वार्ता देगलूर प्रतिनिधी -संतोष मनधरणे 

देगलूर प्रतिनिधी

देगलूर तालुक्यातील दळणवळणाचे मुख्य ठिकाण असलेले जुना बसस्थानक विनापरवाना होल्डिंग व बॅनर तसेच अनेक सोईसुविधांच्या कमतरतेमुळे समस्यांचे माहेरघर बनले आहे. देगलूर तालुक्यात एसटी हे दळणवळणाचे एकमेव साधन असून, दिवसभर जवळजवळ ८० ते ८५ एसटीच्या फेऱ्या सुरू असतात. त्यामुळे देगलूर जुना बसस्थानकात प्रवाशांची नेहमी वर्दळ असते. मात्र, स्थानकात अनेक सोईसुविधांची कमतरता असल्याने, बस स्थानकाची अत्यंत दयनीय अवस्था झाली असल्याचे पाहावयास मिळत आहे. अद्यापही आवारात काँक्रिटीकरण व पाणपोईची व्यवस्था नाही.

स्थानकातील आवारात अद्यापही काँक्रिटीकरण करण्यात आलेले नाही. त्यामुळे सर्वत्र धुळीचे साम्राज्य पसरत असून, येणाऱ्या-जाणाऱ्या, तसेच बस स्थानकात बसलेल्या प्रवाशांना या धुळीचा त्रास सहन करावा लागत आहे. स्थानकात पाणपोईची व्यवस्था करण्यात आलेली नाही. त्यामुळे येथील प्रवाशांना पिण्यासाठी विकत पाणी घ्यावे लागत आहे. रात्री वस्तीला असलेल्या बस चालक व कंडक्टरलाही पिण्यासाठी पाणी उपलब्ध नसल्याने इतरत्र जाऊन पाणी आणावे लागत आहे. त्यामुळे एसटी महामंडळाच्या संबंधित अधिकाऱ्यांनी याकडे लक्ष देऊन बस स्थानकात असलेल्या समस्या लवकरात लवकर मार्गी लावाव्या, अशी मागणी नागरिक व प्रवाशांकडून करण्यात येत आहे.

पाण्याअभावी बस स्थानकपरिसरात दुर्गंधी

बस स्थानकात असलेल्या गेल्या अनेक महिन्यांपासून पाणी येत नसल्याने, येथे असलेल्या शौचालय व मुतारीची दुरवस्था झाली आहे. पाण्याअभावी शौचालय व मुतारीची व्यवस्थितपणे स्वच्छता होत नाही. अस्वच्छतेमुळे काही जण बाहेरच लघुशंका उरकतात. त्यामुळे बस स्थानक परिसरात सातत्याने उग्र वास येत असतो. येथील नागरिक व महिला प्रवाशांना कायम नाकाला रुमाल बांधून ये-जा करावी लागते. तसेच एस टी महामंडळ जुना बसस्थानका मध्ये विनापरवाना होल्डिंग व बॅनर चे जणू काय टेंडर घेतले असे दिसून येत आहे. अनेक होल्डिंग, बॅनर त्या ठिकाणी लावल्यामुळे प्रवाशांना बसण्यास अडचण येत असून याकडे प्रशासनाने लवकरात लवकर लक्ष दिले पाहिजे.