दै चालु वार्ता 
पक्षाच्या भविष्यासाठी योग्य निर्णय !
आगामी महापालिका आणि जिल्हा परिषद निवडणुकांच्या तोंडावर उपमुख्यमंत्री अजित पवार यांच्या नेतृत्वातील राष्ट्रवादी काँग्रेसला मोठा धक्का बसला आहे. नागपूर जिल्हाध्यक्ष बाबा गुजर यांनी आपल्या पदाचा राजीनामा दिला आहे.
हा निर्णय पक्षाच्या भविष्यासाठी योग्य असल्याचे त्यांनी स्पष्ट केले.
मागील आठ वर्षांपासून जिल्हाध्यक्षपदाची जबाबदारी सांभाळणाऱ्या गुजर यांनी आरोग्याच्या कारणांसह नव्या पिढीला संधी द्यावी या उद्देशाने पदाचा राजीनामा दिल्याचे सांगितले.
पत्रकारांशी संवाद साधताना बाबा गुजर म्हणाले की, “मी गेली आठ वर्ष या पदावर काम केले. आता इतर कार्यकर्त्यांना संधी मिळावी अशी माझी इच्छा आहे. पक्ष वाढीसाठी जो कोणी कार्यकर्ता प्रामाणिकपणे मेहनत करेल त्याचे मी नेहमीच अभिनंदन करीन. माझ्यासोबत ज्यांनी काम केले, त्यात उपमुख्यमंत्री अजित पवार, प्रफुल पटेल, तसेच प्रदेशाध्यक्ष सुनील तटकरे यांचे मी आभार मानतो.”
गुजर यांनी हा राजीनामा तडकाफडकी न देता मागील 15 दिवसांपासून वरिष्ठांना सांगितल्याचे स्पष्ट केले. “मी स्वतःच्या इच्छेने पद सोडत आहे. माझ्यावर कोणतीही नाराजी नाही, पक्षाविषयी कुठलीही खंत नाही. मी अजूनही पक्षाच्या कामासाठी सक्रिय राहणार आहे असं त्यांनी स्पष्ट केलं.
पक्षातील अलीकडील बदलांविषयी विचारले असता त्यांनी स्पष्ट केले की, शहराध्यक्ष पदावरून प्रशांत पवार यांना कमी करून अनिल अहिरकर यांची नियुक्ती करण्यात आली असली तरी यामुळे आपल्यात कुठलाही असंतोष नाही. उलट प्रशांत पवार यांची टीम आता अनिल अहिरकर यांच्यासोबत खांद्याला खांदा लावून काम करत असल्याचे त्यांनी नमूद केले.
“ग्रामीण जिल्हाध्यक्षपदी जो कोणी नियुक्त होईल त्याला मी येणाऱ्या जिल्हा परिषद व पंचायत समिती निवडणुकांमध्ये पूर्ण ताकदीने मदत करेन. शेवटी पक्ष हाच महत्त्वाचा आहे,” असेही गुजर म्हणाले.
आपल्या पुढील राजकीय वाटचालीबाबत बोलताना त्यांनी सांगितले की, “जर वरिष्ठांनी प्रदेश स्तरावर मला काही जबाबदारी दिली तर त्या संधीचे सोने करून पक्षवाढीसाठी सर्वतोपरी प्रयत्न करेन. असेही बाबा गुजर म्हणाले.
बाबा गुजर यांनी कबूल केले की, काही वेळा कार्यकर्त्यांनी मोठे पदाधिकारी कार्यकर्त्यांकडे लक्ष देत नाही अशी तक्रार केली होती. मात्र, स्वतःला अशी कोणतीही खंत नसल्याचे त्यांनी ठामपणे सांगितले. मी स्वखुशीने राजीनामा दिला असून, हा निर्णय केवळ नवीन नेतृत्वाला वाव देण्यासाठी घेतला आहे, असेही ते म्हणाले.
