पुण्यात महापालिका निवडणूक अजित पवारांच्या राष्ट्रवादी काँग्रेस बरोबर एकत्र लढणार नाही…

कोणी केली घोषणा…

महापालिकेची आगामी निवडणूक राष्ट्रवादी काँग्रेस (शरद पवार) पक्ष महाविकास आघाडीचा भाग म्हणूनच निवडणूक लढवेल. राष्ट्रवादी काँग्रेस (अजित पवार) पक्ष किंवा महायुतीमधील कोणत्याही पक्षाबरोबर उघड किंवा छुपी आघाडी केली जाणार नाही,’ असे पक्षाचे शहराध्यक्ष प्रशांत जगताप आणि प्रवक्ते अंकुश काकडे यांनी स्पष्ट केले.

महापालिका निवडणुकीच्या पार्श्वभूमीवर राष्ट्रवादी काँग्रेस (शरद पवार) पक्षाची मासिक कार्यकारिणी बैठक झाली. त्यावेळी शहराध्यक्ष जगताप व काकडे यांनी माध्यमांशी संवाद साधला. जगताप म्हणाले, ‘नगरपंचायतीच्या निवडणुकीसाठी काही ठिकाणी दोन्ही राष्ट्रवादी एकत्र आल्याची चर्चा सुरू आहे. मात्र, हे निर्णय स्थानिक पातळीवरील आहेत. या प्रकारची कोणतीही युती पुण्यात होणार नाही.

महापालिकांच्या निवडणुकीबाबत पक्षश्रेष्ठी योग्य ते निर्णय घेतील, त्यानुसार महाविकास आघाडी म्हणून आम्ही निवडणूक लढवू. महायुतीमुळे पुणेकरांनी बरेच काही गमावले आहे, हाच आमचा प्रचाराचा मुख्य मुद्दा असेल. त्यामुळे महायुतीचा घटकपक्ष असलेल्या पक्षाबरोबर आम्ही जाणार नाही, असे जगताप यांनी स्पष्ट केले.

कोल्हापूरमध्येही दोन्ही राष्ट्रवादींची आघाडी झालेली नाही. चंदगड तालुक्यात काँग्रेस आणि राष्ट्रवादी काँग्रेसची चर्चा झाली आहे. आम्ही तिथे महाविकास आघाडीचा भाग म्हणूनच लढत आहोत. दोन राष्ट्रवादी एकत्र येतील, अशी आमच्या कार्यकर्त्यांमध्ये कोणतीही चर्चा नाही. महाविकास आघाडीमध्ये वाद न होता आम्ही एकत्रितपणे लढू,’ असे काकडे यांनी सांगितले.

आगामी महानगरपालिका निवडणुकीसाठी पूर्वतयारीचा शेवटचा टप्पा म्हणून मंगळवारी आरक्षण सोडत जाहीर झाली. या पार्श्वभूमीवर राष्ट्रवादी काँग्रेस (शरद पवार ) पक्षाची ५२ वी मासिक आढावा बैठक पंडित जवाहरलाल नेहरू सांस्कृतिक भवन येथे पार पडली. पक्षाचे शहराध्यक्ष प्रशांत जगताप यांच्या अध्यक्षतेखाली झालेल्या या आढावा बैठकीत महानगरपालिका निवडणुकीच्या पूर्वतयारीचा आढावा घेण्यात आला. आगामी महानगरपालिका निवडणुकीत राष्ट्रवादी काँग्रेस पक्ष (शरद पवार) पक्ष हा भारतीय राष्ट्रीय काँग्रेस, शिवसेना (उद्धव ठाकरे) आणि इतर समविचारी पक्षाबरोबर आघाडी करून निर्धाराने लढणार आहे. तसेच, पक्षाच्या वतीने इच्छुक उमेदवारांना उमेदवारी अर्ज वाटपाचा शुभारंभही या बैठकीच्या माध्यमातून करण्यात आला.

महायुतीने पुणे शहराला वाहतूक कोंडी, गुन्हेगारी, बकालपणा अशा संकटात नेऊन सोडले आहे. तसेच, महायुतीतील तीनही पक्ष समाजात धार्मिक तेढ निर्माण करण्यात आघाडीवर आहेत. अशा धर्मांध शक्तींना सोबत न घेता पुरोगामी महाराष्ट्राची पताका खांद्यावर घेऊन आपण पुणे शहराला पुन्हा एकदा सुसंस्कृत व सुनियोजित शहर बनवण्यासाठी निर्धाराने लढू अशी भूमिका प्रशांत जगताप यांनी जाहीर केली. यावेळी आमदार बापू पठारे, माजी आमदार जयदेवराव गायकवाड, अंकुश काकडे, रवींद्र माळवदकर, प्रकाश मस्के यांच्यासह सर्व पदाधिकारी व कार्यकर्ते मोठ्या संख्येने उपस्थित होते.