एकनाथ शिंदे पुन्हा मुख्यमंत्री होतील…

महायुतीतील मंत्र्याचाच दावा; राजकारण तापणार ?

शिवसेनेतून बंडखोरी केल्यानंतर एकनाथ शिंदे यांना मुख्यमंत्री बनवण्यात आले होते. त्यामुळे विधानसभा निवडणुकीनंतर एकनाथ शिंदेंना पुन्हा मुख्यमंत्री बनण्याची इच्छा होती. शिवसेना शिंदे गटाकडून देखील एकनाथ शिंदे यांनाच मुख्यमंत्री करा, अशी मागणी जोर धरत होती.

तर दुसरीकडे मुख्यमंत्रीपद मिळत नसल्याने एकनाथ शिंदेही अनेकदा नाराज असल्याचे दिसून आले होते. मात्र भाजपाच्या जास्त जागा असल्यामुळे देवेंद्र फडणवीस मुख्यमंत्री झाले. असे असले तरी एकनाथ शिंदे पुन्हा मुख्यमंत्री होतील, असा विश्वास शालेय शिक्षण मंत्री तथा शिवसेना शिंदे गटाचे ज्येष्ठ नेते दादा भुसे यांनी व्यक्त केला आहे.

नगरपरिषद आणि नगरपंचायत निवडणुकीच्या पार्श्वभूमीवर दादा भुसे आज (26 नोव्हेंबर) नंदुरबारमध्ये प्रचारासाठी आले होते. यावेळी माध्यमांशी संवाद साधताना ते म्हणाले की, जनतेला आजही विचारलं की, त्यांच्या मनातील मुख्यमंत्री कोण? तर जनता सांगेल की, एकनाथ शिंदे. कारण महाराष्ट्राने एकनाथ शिंदे यांच्यासारखा मुख्यमंत्री कधी पाहिला नाही ही वस्तुस्थिती आहे. त्यामुळे काळजी करू नका, परत या महाराष्ट्राचे नेतृत्व एकनाथ शिंदे करताना आपण सर्वजण पाहणार आहोत, असा विश्वास त्यांनी व्यक्त केला.

एकनाथ शिंदे यांच्याबद्दल बोलताना दादा भुसे म्हणाले की, अगदी महाराष्ट्राच्या कानाकोपऱ्यातून झोपडपट्टीतून आलेला माणूस मुख्यमंत्र्यांना (एकनाथ शिंदे) भेटल्याशिवाय जात नव्हता. विशेष म्हणजे एकनाथ शिंदे प्रत्येक माणसाला भेटल्याशिवाय झोपायलाही जात नव्हते. उपमुख्यमंत्री अजित पवार प्रत्येक सभेत सांगतात महाराष्ट्राच्या इतिहासात एवढ्या सह्या करणारा मुख्यमंत्री मी कधी पाहिला नव्हता, असे म्हणत भुसे यांनी एकनाथ शिंदे पुन्हा मुख्यमंत्री होणार असल्याचा एकप्रकारे दावाच केला. मात्र दादा भुसे यांच्या या विधानामुळे राज्यातील राजकारण तापणार असून भाजपा नेते काय टीका करतात, हे पाहावे लागेल.

दरम्यान, नगरपालिका निवडणुकीबद्दल बोलताना दादा भुसे म्हणाले की, नंदुरबार नगरपालिकेवर शिवसेनाच भगवा झेंडा फडकणार आहे. कारण आपल्या विरोधात असलेले नेते, आता आपल्यासोबत आहेत. आपल्याला नगरपालिकेचा विकास करायचा आहे. त्यामुळे काळजी करायचं काही काम नाही. कारण नगरविकास विभाग एकनाथ शिंदे यांच्याकडे असल्यामुळे या शहराच्या विकासासाठी लागणारा निधी निश्चितपणे उपलब्ध होईल, असेही दादा भुसे यांनी स्पष्ट केले.