लोकअदालत १३ डिसेंबरला; ई-चलान प्रकरणांना तडजोड मान्य नाही – वाहतूक विभागाचे स्पष्टीकरण

ठाणे जिल्हा ग्रामीण प्रतिनिधी, विकी जाधव

मुंबई- येत्या १३ डिसेंबर २०२५ रोजी राज्यभर आयोजित करण्यात येणाऱ्या लोकअदालतीमध्ये ई-चलान प्रकरणांची कोणतीही तडजोड स्वीकारली जाणार नाही, असे स्पष्ट निर्देश अपर पोलीस महासंचालक (वाहतूक), महाराष्ट्र राज्य, मुंबई यांच्या कार्यालयाकडून जारी करण्यात आले आहेत.

माहितीनुसार, सन २०२५ पासून प्रलंबित असलेल्या ई-चलान प्रकरणांच्या निपटाऱ्यासाठी वाहतूक विभागाकडून महाराष्ट्र राज्य विधी व सेवा प्राधिकरणाच्या मंजुरीने प्रयत्न सुरू आहेत. मात्र आगामी लोकअदालतीत ही प्रकरणे तडजोडीसाठी न मांडण्याचा निर्णय वाहतूक विभागाने घेतल्याचे आदेशपत्रात स्पष्ट करण्यात आले आहे.

दरम्यान, काही यूट्यूब, इंस्टाग्राम आणि सामाजिक माध्यमांवर १३ डिसेंबरच्या लोकअदालतीत ई-चलान दंडात सवलत मिळणार असल्याचा भ्रामक प्रचार केल्याचे पोलीस विभागाच्या निदर्शनास आले आहे. अशा अफवांवर विश्वास ठेवू नये, कारण त्यामुळे नागरिकांची आर्थिक फसवणूक होण्याची शक्यता वर्तवली जात आहे.

पोलीस विभागाने नागरिकांना सतर्कतेचे आवाहन करताना सांगितले की,

ई-चलान तडजोड किंवा दंडात सवलत याबाबत सोशल मीडियावरील कोणत्याही अपप्रचाराला बळी पडू नये.

कोणत्याही अनधिकृत लिंकद्वारे ई-चलानची रक्कम भरू नये.

जर कोणत्याही नागरिकाचे प्रकरण स्थानीय जिल्हा विधी व सेवा प्राधिकरणाने लोकअदालतीसाठी ठेवले असेल, तर संबंधित न्यायालय किंवा स्थानिक वाहतूक पोलीसांशी थेट संपर्क साधावा.

या संदर्भातील अधिकृत माहिती पोलीस अधीक्षक (मुख्यालय) सुनील भारव्दाज यांनी अपर पोलीस महासंचालक (वाहतूक) कार्यालयाच्या वतीने प्रसिद्ध केली आहे.