चेतना कॉलेज ऑफ फार्मसी येथे स्पर्धा परीक्षा GPAT मार्गदर्शन सत्र प्रेरणादायी वातावरणात संपन्न

दैनिक चालु वार्ता, इंदापूर प्रतिनिधी-बापू बोराटे

पुणे(इंदापूर):-चेतना कॉलेज ऑफ फार्मसी, सरडेवाडी, इंदापूर येथे आज बुधवार दि. 11 फेब्रुवारी 2026 रोजी दुपारी 1.00 वाजता विद्यार्थ्यांसाठी GPAT परीक्षेच्या तयारीसाठी विशेष मार्गदर्शन सत्राचे आयोजन करण्यात आले होते. या कार्यक्रमासाठी पुणे येथील ‘अकॅडमी ऑफ फार्मास्युटिकल एक्सलन्स’चे संस्थापक मोहन राव अड्डी हे प्रमुख वक्ते व मार्गदर्शक म्हणून उपस्थित होते.

या सत्रात अड्डी यांनी GPAT परीक्षेची रचना, अभ्यासक्रमाचे सखोल विश्लेषण, महत्त्वाचे विषय, गुणांकन पद्धती, तसेच स्पर्धात्मक परीक्षांमध्ये यश मिळवण्यासाठी आवश्यक असलेल्या रणनीती याविषयी सविस्तर माहिती दिली. त्यांनी मागील वर्षांच्या प्रश्नपत्रिकांचे विश्लेषण करून विद्यार्थ्यांना कोणत्या विषयांवर अधिक भर द्यावा, कोणत्या चुका टाळाव्यात आणि वेळेचा योग्य वापर कसा करावा याचे मार्गदर्शन केले.

तसेच, नियमित अभ्यास, पुनरावलोकन (Revision), मॉक टेस्ट्स, नोट्स तयार करणे, आत्ममूल्यांकन आणि मानसिक तयारी यांचे महत्त्व त्यांनी अधोरेखित केले. अपयशाला न घाबरता सातत्याने प्रयत्न केल्यास यश निश्चित मिळते, असा विश्वास त्यांनी विद्यार्थ्यांमध्ये निर्माण केला.

विद्यार्थ्यांशी संवाद साधत त्यांनी त्यांच्या शंकांचे निरसन केले आणि वैयक्तिक अभ्यासयोजनेचे महत्त्व स्पष्ट केले. या सत्रात विद्यार्थ्यांनी उत्स्फूर्तपणे प्रश्न विचारून मार्गदर्शनाचा लाभ घेतला.

या कार्यक्रमास संस्थेचे अध्यक्ष उदय देशपांडे ,सचिव विलास भोसले, खजिनदार सोमनाथ माने सर , सदस्य बाळासाहेब बोराटे , तसेच प्राचार्य डॉ.गणेश म्हस्के सर यांची प्रमुख उपस्थिती होती.व्यवस्थापन मंडळ, सर्व प्राध्यापक व शिक्षकेतर कर्मचारी तसेच मोठ्या संख्येने विद्यार्थी उपस्थित होते.

या कार्यक्रमाचे सूत्र संचालन प्रा. ऋतुजा धायगुडे यांनी केले, तर आभार प्रदर्शन महाविद्यालयाचे प्राचार्य डॉ. गणेश म्हस्के यांनी केले .