महापशुधन एक्स्पो २०२६ मध्ये गुडसूरच्या ‘सोनू’ची सुवर्ण झेप.   देवणी गायींच्या अखिल भारतीय स्पर्धेत प्रथम क्रमांक; मुख्यमंत्री यांच्या हस्ते नागनाथ शेटकारांचा सन्मान

दैनिक चालु वार्ता उदगीर, प्रतिनिधी-अविनाश देवकते

लातूर (उदगीर) : परळी येथे आयोजित अखिल भारतीय पशुपक्षी प्रदर्शन महापशुधन एक्स्पो २०२६ मध्ये गुडसूर (ता. उदगीर, जि. लातूर) येथील पशुपालक नागनाथ त्र्यंबक शेटकार यांच्या ‘सोनू’ या देवणी गायीने मादी गाय गटात प्रथम क्रमांक पटकावून उल्लेखनीय यश संपादन केले. या कामगिरीमुळे गुडसूर गावासह उदगीर तालुक्याचा नावलौकिक उंचावला आहे.

या यशाबद्दल शेटकार यांचा सन्मान मुख्यमंत्री देवेंद्र फडणवीस यांच्या हस्ते करण्यात आला. यावेळी पशुसंवर्धन मंत्री पंकजा मुंडे, आमदार धनंजय मुंडे, पशुसंवर्धन व दुग्ध व्यवसाय विभागाचे सचिव डॉ. एन. रामास्वामी, महाराष्ट्र पशु व मत्स्य विज्ञान विद्यापीठाचे (MAFSU) कुलगुरू डॉ. नितीन पाटील, गोसेवा आयोगाचे अध्यक्ष प्रविण मुंदडा आदी मान्यवर उपस्थित होते.

साडेपाच वर्षांची ‘सोनू’ उत्कृष्ट बांधा, आकर्षक ठेवण आणि उच्च दुधाळ क्षमतेमुळे परीक्षकांचे विशेष लक्ष वेधून घेत अव्वल ठरली. देशभरातील विविध पशुपालकांच्या देवणी गायींमध्ये झालेल्या चुरशीच्या स्पर्धेत ‘सोनू’ने सरस कामगिरी करत प्रथम क्रमांक पटकावला.

‘सोनू’ची यशस्वी परंपरा यापूर्वीही कायम राहिली आहे. महापशुधन एक्स्पो २०२३ (शिर्डी) येथे तिने अखिल भारतीय स्तरावर चॅम्पियन होण्याचा मान मिळविला होता. तसेच माळेगाव खंडोबा यात्रा, सिद्धेश्वर यात्रा (लातूर), हावगीस्वामी यात्रा (उदगीर) आणि जळकोट येथील पशुपक्षी प्रदर्शनातही तिने सातत्याने पुरस्कार पटकावले आहेत.

‘सोनू’च्या संगोपनात शास्त्रीय पद्धतींचा अवलंब करण्यात आला आहे. महाराष्ट्र पशु व मत्स्य विज्ञान विद्यापीठाचे माजी विस्तार शिक्षण संचालक डॉ. अनिल भिकाने तसेच पशुवैद्यकीय दवाखाना, गुडसूरचे प्रमुख डॉ. मयुरेश हलबुर्गे यांनी वेळोवेळी आहार, आरोग्य आणि पशुवैद्यकीय व्यवस्थापनाबाबत मार्गदर्शन केले. त्यांच्या मार्गदर्शनामुळेच ‘सोनू’ची गुणवत्ता अधिक वृद्धिंगत झाल्याचे शेटकार यांनी नमूद केले.

जिल्हा पशुसंवर्धन उपायुक्त डॉ. राजकुमार पडिले, सहाय्यक आयुक्त डॉ. श्रीधर शिंदे, पंचायत समिती उदगीरचे विस्तार अधिकारी डॉ. विजय कपाळे यांच्यासह गुडसूरचे उपसरपंच बालाजी देमगुंडे, विश्वनाथ मुडपे, अनिल लांजे, विनोबा पाटील, विश्वनाथ होळसंबरे, नवनाथ जगळपुरे, बालाजी कुलकर्णी, इस्माईल पठाण तसेच ग्रामस्थ आणि पशुवैद्यकीय दवाखान्याचे कर्मचारी संतोष कराड, ज्ञानेश्वर बडे, इंद्रजित सोमवंशी यांनीही शेटकार यांचे अभिनंदन केले.

‘सोनू’च्या या भव्य यशामुळे परिसरातील पशुपालकांना प्रेरणा मिळाली असून आधुनिक व शास्त्रीय पशुपालन पद्धतींचा अवलंब केल्यास ग्रामीण भागातही राष्ट्रीय स्तरावर यश संपादन करता येते, हे अधोरेखित झाले आहे.