जिल्ह्यातील टॅक्सी चालकांना गोव्यात आर्थिक भूर्दंड..!

सांवंतवाडी, ता. १९ः गोव्यात टॅक्सी चालक म्हणून सेवा देणाऱ्या सिंधुदुर्गच्या तरुणांच्या समस्येबांबत माजी राज्यमंत्री प्रवीण भोसले यांनी गोव्याचे मुख्यमंत्री डॉ. प्रमोद सावंत यांचे लक्ष वेधले.

त्यांना आर्थिक भूर्दंडातून दिलासा द्यावा, अशी मागणी त्यांनी यावेळी केली. याला डॉ. सावंत यांनी सकारात्मक प्रतिसाद दिला.

गोव्याचे मुख्यमंत्री डॉ. सावंत व माजी राज्यमंत्री भोसले यांची एका कार्यक्रमाच्या निमित्ताने भेट झाली. या भेटीत श्री. भोसले यांनी सावंतवाडी, दोडामार्ग व वेंगुर्ले तालुक्यातील हजारो तरुण कामधंदा व नोकरीसाठी रोज ये-जा करतात. बरेच तरुण गोव्यातील टॅक्सी चालक म्हणून मोपा विमानतळ, रेल्वे स्टेशनला टुरिस्ट कार वेगवेगळ्या ठिकाणी सेवा देतात. या असंख्य ड्रायव्हर यांना गोव्यातील पोलीस महाराष्ट्र लायसन्स, टॅक्सी बॅच असतानाही गोवा राज्याचा टॅक्सी बॅच पाहिजे, असा आग्रह करतात. बराच वेळा दंड ही वसूल केला जातो. यामुळे त्यांना आर्थिक भूदंड सोसावा लागतो, असे सांगितले.

याबाबत रीतसर लक्ष घालून गोवा राज्याचे गृहसचिव यांच्यामार्फत सिंधुदुर्ग जिल्ह्यातील टॅक्सी चालकांना न्याय देऊ, असे आश्वासन श्री. सावंत यांनी दिले. सिंधुदुर्ग गोवा टॅक्सी चालक संघटनेचे प्रमुख बांदा येथील रहिवासी लक्ष्मण तर्फे यांनी श्री. भोसले यांच्याकडे हा प्रश्न बऱ्याच वेळा मांडला होता. त्याला अनुसरून श्री. भोसले यांनी या प्रश्नाची दखल घेतली.