दै चालु वार्ता 
एकनाथ शिंदेंनीच केला करेक्ट कार्यक्रम, महत्त्वाच्या पदावरुन हटवलं
विधानसभा निवडणुकीपूर्वी शिवसेनेचे नेते संजय शिरसाट यांच्याकडे सिडको महामंडळाच्या अध्यक्षपदाची धुरा सोपवण्यात आली होती. त्यावेळी एकनाथ शिंदे हे मुख्यमंत्री होते आणि त्यांनीच शिरसाट यांची सिडकोच्या अध्यक्षपदी नियुक्ती केली होती.
मात्र, आता एकनाथ शिंदे यांनीच सजय शिरसाट यांना या पदावरुन हटवलं आहे.
राज्य शहर व औद्योगिक विकास महामंडळ मर्यादित (सिडको) महामंडळाच्या अध्यक्षपदावरुन संजय शिरसाट यांना हटवण्याचा निर्णय घेण्यात आला आहे. संजय शिरसाट यांची नियुक्ती संपुष्टात आणण्यात आली आहे. या संदर्भात शासन निर्णय जाहीर करण्यात आला आहे.
संजय शिरसाट यांची देवेंद्र फडणवीस यांच्या मंत्रिमंडळात वर्णी लागली आहे. संजय शिरसाट यांच्याकडे कॅबिनेट मंत्रिपद आहे. त्यासोबतच सिडकोचे अध्यक्षपद सुद्धा होते. मंत्रिपदावर नियुक्ती झाल्याने त्यांच्याकडी सिडकोच्या अध्यक्षपदाची जबाबदारी काढण्यात येईल हे निश्चित होते. या संदर्भात गुरुवारी (16 जानेवारी) शासन निर्णय जाहीर करण्यात आला.
नगरविकास विभागाचा शासन निर्णय
या शासन निर्णयात म्हटले की, शहर व औद्योगिक विकास महामंडळ (महाराष्ट्र) मर्यादित (सिडको) च्या आर्टिकल ऑफ असोसिएशनमधील आर्टिकल 202 अन्वये प्रदान करण्यात आलेल्या अधिकारास अनुसरुन संजय शिरसाट यांची मंत्री म्हणून नियुक्ती झाली असल्याने त्यांच्याकडे सोपवण्यात आलेला शहर व औद्योगिक विकास महामंडळ (सिडको) येथील अध्यक्षपदाचा कार्यभार या आदेशान्वये संपुष्टात आणण्यात येत आहे.
नेमकं काय घडलं?
नियमानुसार, मंत्रिपदावर असलेली व्यक्ती महामंडळाच्या अध्यक्षपदाचा राजीनामा देणे अपेक्षित आहे. मात्र, मंत्रिपदाची शपथ घेतल्यानंतरही संजय शिरसाट हे सिडकोच्या अध्यक्षपदावर होते. त्यांनी आपल्या अध्यक्षपदाचा राजीनामा देणे अपेक्षित होते. पण त्याउलट संजय शिरसाट हे संचालक मंडळाच्या बैठका घेऊन निर्णयांचा सपाटा लावताना दिसत होते. एकच व्यक्ती दोन पदांवर राहणे आणि लाभाचे पद उपभोगणे याबाबत पक्षातूनच नाराजी व्यक्ती होत होती.
यासोबतच सिडकोची घरे स्वस्त होतील अशी घोषणा सुद्धा शिरसाट यांनी केली होती. पण नुकत्याच जाहीर झालेल्या लॉटरीत सिडकोच्या अनेक घरांच्या किमती या सर्वसामान्यांच्या अवाक्याबाहेर असल्याचं पहायला मिळालं. यामुळे सर्वसामान्य नागरिकांमध्ये सुद्धा नाराजी दिसून आली.
एकच व्यक्ती दोन पदांवर असणे, संचालक मंडळाच्या बैठका घेऊन निर्णयांचा सपाटा लावणे आणि वादग्रस्त घोषणा यामुळे संजय शिरसाट यांची उचलबांगडी झाल्याची चर्चा जोरदार सुरू आहे.
