छावा चित्रपटाच्या प्रदर्शनाचा वाद, मंत्री उदय सामंत यांची रोखठोक भूमिका..!

हिंदी चित्रपट सृष्टीतील पंचतारांकित अभिनेता विकी कौशल आणि अभिनेत्री रश्मिका मंदाना यांच्या प्रमुख भूमिका असलेला ‘छावा’ चित्रपटाच्या ट्रेलरमध्ये छत्रपती संभाजी महाराज आणि महाराणी येसूबाई एकत्र नृत्य करताना दाखवले असल्याने नव्या वादाला तोंड फुटले आहे.

जर हे दृश्य चित्रपटातून काढले नाही तर चित्रपट प्रदर्शित होऊ देणार नाही, अशी भूमिका शिवप्रेमींनी घेतली आहे. त्यामुळे सरकारची भूमिकाही आता महत्त्वाची असणार आहे.

चित्रपट तज्ज्ञ आणि जाणकारांना आधी दाखवण्यात यावा त्याशिवाय प्रदर्शित करू नये अशी आमची भूमिका आहे. महाराजांच्या सन्मानाला बाधा पोहोचेल अशी कुठलीही गोष्ट खपवून घेतली जाणार नाही, असे मंत्री उदय सामंत यांनी स्पष्ट केले आहे.

...तशी कुठलीही गोष्ट खपवून घेतली जाणार नाही

धर्मरक्षक,स्वराज्यरक्षक छत्रपती संभाजी महाराज यांच्या जीवनावर आधारित हिंदी चित्रपट बनणे ही आनंदाची गोष्ट आहे, छत्रपतींचा इतिहास जगाला समजावा यासाठी असे प्रयत्न आवश्यक आहे. मात्र या चित्रपटात काही आक्षेपार्ह दृश्ये असल्याबाबत अनेकांनी मते व्यक्त केली आहेत. हा चित्रपट तज्ज्ञ आणि जाणकारांना आधी दाखवण्यात यावा त्याशिवाय प्रदर्शित करू नये अशी आमची भूमिका आहे. महाराजांच्या सन्मानाला बाधा पोहोचेल अशी कुठलीही गोष्ट खपवून घेतली जाणार नाही, असे सामंत म्हणाले.

...तर हा चित्रपट प्रदर्शित होऊ देणार नाही

चित्रपटाच्या निर्माते आणि दिग्दर्शकांनी तातडीने या बाबत उपाययोजना करून आक्षेपार्ह काही असेल तर काढून टाकलं पाहिजे अशी आमची भूमिका आहे. चित्रपट पाहून पुढील निर्णय घेतला जाईल, याशिवाय हा चित्रपट प्रदर्शित होऊ देणार नाही, असा स्पष्ट इशारा सामंत यांनी दिला आहे.

संभाजीराजे यांचीही आक्रमक भूमिका

छत्रपती संभाजी महाराज यांच्या जीवनावर चित्रपट येतोय, ही आनंदाची बाब आहे. त्यानिमित्ताने संभाजी महाराजांचा इतिहास पुढे येईल. चित्रपटाचे दिग्दर्शक लक्ष्मण उतेकर यांची टीम मला येऊन भेटली होती. त्यांनी ट्रेलरची क्लिप मला दाखवली. पण मी त्यांना संपूर्ण चित्रपट दाखविण्याचे सांगितले होते. तसेच मी त्यांना काही इतिहासकार जोडून देणार होतो, जेणेकरून चित्रपटात एखादी चूक असेल तर ती दुरूस्त करता येईल. पण त्यांनी इतिहासकारांशी भेटण्यात स्वारस्य दाखवले नाही, अशी भूमिका छत्रपती संभाजीराजे यांनी घेतली आहे.