उदगीर शहर स्वच्छ व सुंदर करण्यासाठी प्रशासनाने त्वरित उपाययोजना कराव्यात.  स्वच्छता मोहीम राबवून उदगीरला कचरा मुक्त करा – सामाजिक कार्यकर्त्यांची भूमिका

दैनिक चालु वार्ता उदगीर प्रतिनिधी -अविनाश देवकते

लातूर (उदगीर) : उदगीर शहरातील विविध भागांमध्ये अनेक रिकामे प्लॉट आहेत, जेथे स्वच्छतेचा अभाव असल्याने नागरिकांना त्रास सहन करावा लागत आहे. या संदर्भात सामाजिक कार्यकर्ते व पत्रकार रामबिलास नावंदर खेर्डेकर यांनी मुख्याधिकारी, नगर परिषद, उदगीर यांना निवेदन देऊन रिकाम्या प्लॉट धारकांवर कारवाई करण्याची मागणी केली आहे.

प्लॉट स्वच्छ नसेल, तर कारवाई अनिवार्य

शहरातील अनेक वॉर्डांमध्ये रिकामे प्लॉट कचऱ्याचे ढीग साठवण्यासाठी वापरले जात असून, त्यामुळे कुत्रे, डुकरे व अन्य जनावरांचे प्रमाण वाढत आहे. तसेच, घाणीमुळे नागरिकांना दुर्गंधीचा सामना करावा लागत आहे. ही परिस्थिती पाहता, प्रशासनाने याची दखल घ्यावी आणि रिकाम्या प्लॉट धारकांना ते स्वच्छ ठेवण्याच्या सूचना द्याव्यात, अन्यथा त्यांच्यावर योग्य ती कारवाई करण्यात यावी, अशी मागणी नावंदर यांनी केली आहे.

निडेबन ग्रामपंचायत हद्दीत घाणीचे साम्राज्य

उदगीर शहरालगत असलेल्या निडेबन ग्रामपंचायत हद्दीत देखील स्वच्छतेचा मोठा अभाव असून, येथे अनेक ठिकाणी कचरा व सांडपाणी रस्त्यावर टाकले जात आहे. विशेषतः बिदरगेटजवळील उड्डाणपूल परिसरात घाणीचे साम्राज्य पसरले असून, एका भव्य इमारतीतून सर्रास सांडपाणी दोन-तीन मजल्यांवरून थेट रस्त्यावर टाकले जात आहे. यामुळे साईनगर भागातील रहिवाशांना मोठा त्रास होत आहे.

प्रशासनाने त्वरित पावले उचलावीत

नगर परिषद आणि संबंधित अधिकाऱ्यांनी शहर आणि ग्रामपंचायत हद्दीत स्वच्छतेसाठी कठोर उपाययोजना राबवाव्यात. कचरा टाकणाऱ्या आणि सार्वजनिक स्वच्छतेचे उल्लंघन करणाऱ्यांवर कडक दंडात्मक कारवाई करावी, अशी मागणी नागरिकांकडून होत आहे.

महत्वाच्या मागण्या:

रिकाम्या प्लॉट धारकांनी आपले प्लॉट नियमितपणे स्वच्छ ठेवावेत.

घाण साचलेल्या प्लॉटधारकांवर प्रशासनाने दंडात्मक कारवाई करावी.

निडेबन ग्रामपंचायत हद्दीतील सांडपाणी आणि कचऱ्याच्या समस्येवर त्वरित उपाय योजावा.

नगर परिषद आणि ग्रामपंचायतीने घाणीविरोधात विशेष मोहीम हाती घ्यावी.

“शहर आणि ग्रामपंचायत हद्द स्वच्छ व सुंदर राहावी, यासाठी प्रशासनाने त्वरित पावले उचलावीत,” अशी मागणी सामाजिक कार्यकर्ते रामबिलास नावंदर खेर्डेकर यांनी केली आहे.